Aqtaýdaǵy jarylystan búlingen biraq resmi tizimge enbei qalǵan kólik ieleri keltirilgen shyǵyndy óteý úshin saraptama jasaýdy surap otyr, - dep habarlaidy Tengrinews.kz.
Jarylysta ǵimarat mańyndaǵy kólikter ǵana emes, jarylys ornynan 120 metr qashyqta ornalasqan "Suńqar" kooperativ aýmaǵynda bolǵan kólikter de búlingen. Kólikterdiń biriniń iesi Edýar Egorovtyń aitýynsha, politsiia olardyń shyǵynyn áli tirkemegen.
"Avtokóliktiń terezesi synǵan, qalǵan bóligi de zaqymdalǵan. Jarylystan ushqan synyq kólikti zaqymdaǵan. Ford F350 pikap kóligi Aqtaýda sirek kezdesetin kólik. Qajetti bólshekterdi tabý qiyn. Saqtandyrylǵan. Sondai-aq, taǵy bes kólik qirady. Biz shyǵyndy kim óteitinin bilsek deimiz, biraq politsiia eshqandai túsinikteme bergen joq. Bizge oqiǵa ornynda jumys istegen bir ǵana tergeýshi kelip, keltirilgen shyǵyndy tek sot-meditsinalyq sarapshy ǵana baǵalaitynyn aitty", - deidi Edýar Egorov.
Kólik iesi 7 qarashadan beri kólikterge saraptama jasalmaǵanyn aitty. Alǵashynda sot-meditsinalyq sarapshyny tań atqansha kútý keregi aitylǵanymen, 8 qarashada keshke qarai politseiler shyǵyndy jazbady.
Mańǵystaý oblysy IID baspasóz qyzmeti tikelei ǵimarat mańynda nemese jolda turǵan kólikterdi evakýatsiialaǵanyn habarlady. Bul kólikter tergeý aiaqtalǵanǵa deiin qosymsha saraptama júrgizý úshin aiyppul turaǵyna qoiylǵan.
"Basqa búlingen kólikter ǵimarattyń artqy jaǵynda turdy, olardy evakýatsiialaǵan joqpyz. Qazir tergeý-jedel toby oqiǵa ornynda áli de jumys istep jatyr. Barlyq shyǵyn tirkeledi", - dedi politsiia qyzmetkerleri.
Vedomstvo málimetinshe, kólik ielerine keltirilgen shyǵyndy óteý jaýapkershiligi tergeý barysynda anyqtalady.
