Foto: instagram.com/mangystau_oblysynyn_akimdigi
Aqtaý mańynda bolǵan qaiǵyly oqiǵanyń sebep-saldaryn tekserý úshin Úkimettik komissiia quryldy, - dep habarlaidy Ult.kz úkimettiń baspasóz qyzmetine silteme jasap.
Úkimet qaýlysy boiynsha, Aqtaý áýejaiynyń mańynda bolǵan Az Airlines áýekompaniiasynyń Embraer 190 ushaǵynyń apatqa ushyraý sebepterin tekserý boiynsha Úkimettik komissiia quryldy. Tiisti qaýlyǵa premer-ministr Oljas Bektenov qol qoidy.
Komissiia quramyna premer-ministrdiń orynbasary, Mańǵystaý oblysynyń ákimi, tótenshe jaǵdailar, kólik, syrtqy ister, ishki ister, eńbek jáne halyqty áleýmettik qorǵaý, densaýlyq saqtaý ministrlikteriniń basshylyǵy, Bas kólik prokýrory kirgen.
"Komissiiaǵa oqiǵa ornyna dereý ushyp baryp, ushaqtyń apatqa ushyraý sebepterin jan-jaqty tekserýdi qamtamasyz etý, qaza tapqandardyń otbasylaryna jáne zardap shekkenderge alǵashqy kómek kórsetý sharalaryn qabyldaý tapsyryldy", - delingen habarlamada.
Qazaqstan Úkimeti Ázerbaijan Úkimetimen bolǵan oqiǵanyń sebepterin jan-jaqty tergeý jáne alǵashqy kómek kórsetý boiynsha birlesip jumys istep jatyr.
