Foto: QR MAM
Aqtaý qalasynda Túrki áleminiń «Qorqyt ata» kinofestivali saltanatty túrde ashyldy, dep habarlaidy Ult.kz.
Qazan aiynyń 1-5 kúnderi aralyǵynda Mańǵystaý óńiri túrki elderiniń rejisserleri, akterleri, prodiýserleri men kórermenin toǵystyrǵan rýhani jáne mádeni ortalyqqa ainalady.
Kinofestival Túrki mádenietin jáne ónerin damytý halyqaralyq uiymynyń (TÚRKSOI) bastamasymen uiymdastyryldy. Is-shara Ázerbaijan, Qazaqstan, Qyrǵyzstan, Túrkimenstan, Túrkiia jáne Ózbekstannyń ulttyq kino uiymdaryn biriktiredi.
Buǵan deiin festival Stambulda, Býrsada, Shýshada jáne Anaýda (Ashhabad) ótti. 2025 jyly alǵash ret Qazaqstan túrki memleketterin qabyldady. Sebebi Aqtaý qalasy biyl túrki áleminiń mádeni astanasy mártebesine ie boldy. Aqtaý shahary túrki kinematografynyń jańa ortalyǵyna ainaldy. Jiynǵa alǵash ret Majarstannan da mamandar qatysýda.
Saltanatty is-sharanyń ashylý rásimi «Dostyq úiinde» ótti. Festivalde rejisser Dýman Erkimbektiń tolyqmetrajdy alǵashqy týyndysy – «QAITADAN» filmi kórsetildi. Bul kartina qazaq kinosy tarihynda alǵash ret memleket qoldaýymen túsirilip, 1 milliard teńgeden astam qarjy jinap, rekord ornatty.
Saltanatty rásimde QR Ulttyq kinony qoldaý memlekettik ortalyǵynyń Basqarma tóraǵasy Qurmanbek Jumaǵali sóz sóiledi. Onyń aitýynsha, «Qorqyt ata» kinofestivalin Aqtaýda ótkizý – úlken mártebe. Sebebi Aqtaýǵa biyl túrki áleminiń mádeni astanasy ataǵy berildi.
Festivaldiń baiqaý baǵdarlamasyna QR Mádeniet jáne aqparat ministrligi men Ulttyq kinony qoldaý memlekettik ortalyǵynyń qoldaýymen túsirilgen kelesi týyndylar endi: - «Joqtau» (rej. Arýan Anartai) - «Prianiki dlia eio ottsa, moego pradeda, eio deda» (rej. Alina Mýstafina) - «Eva. Batyr qyz» (rej. Temirbek Amanjol) - «Atameken» (rej. Janna Qurmasheva).
Festival aiasynda jetekshi kino qairatkerlerimen shyǵarmashylyq kezdesýler, kinosammit, baiqaý jáne baiqaýdan tys filmder kórsetilimi, sondai-aq Mańǵystaý óńiriniń tumsa tabiǵatyn tanystyratyn mádeni baǵdarlama uiymdastyrylmaq. Baiqaýdan tys baǵdarlamada Kino ortalyǵynyń «Qajymuqan» filmi (rej. Qanaǵat Mustafin) kórsetiledi.
4 qazanda festivaldiń jabylý saltanaty ótip, jeńimpazdar marapattalady. Qazylar alqasy «Úzdik kórkem film», «Úzdik rejisser», «Úzdik stsenarii», «Úzdik aktrisa» jáne «Úzdik akter» nominatsiialary boiynsha jeńimpazdardy anyqtaidy. Buǵan qosa, TÚRKSOI-dyń «Túrki mádenietine qosqan úlesi úshin» arnaiy syilyǵy da tabystalady.
