Aqtaýda keshe kúni boiy jaýǵan jańbyr saldarynan ortalyq kósheler sýǵa tolyp, jańadan salynǵan kópqabatty úilerdiń shatyrynan sý ketti, - dep habarlaidy "Ult aqparat".
Jelide Aqtaý turǵyndarynyń úilerinen ketken sýdy jumyla ózderi tazalap jatqany túsirilgen videolar paida boldy.
«Almatydaǵydai jii jańbyr jaýsa, Aqtaýdyń úileri shydamaityny kórinip tur eken ǵoi» degen pikirmen taratylǵan videoda jańbyr sýynyń shatyrdan bastap, birinshi qabattaǵy baspaldaqqa deiin aǵyp jatqany baiqalady. Videodaǵy kórinistiń 19 shaǵynaýdandaǵy «Tynyshtyq» turǵyn-úi kesheninde bolǵany anyqtaldy.
Aqtaý qalalyq ákimdigi tarapynan atalǵan úidiń buzylǵan jerleri jóndeletini aityldy. Budan bólek, ortalyq kóshelerdi sý basty. Aqtaý qalalyq ákimdigi baspasóz qyzmetiniń málimetinshe, kóshelerdiń sýyn sorýǵa 35 adam jumyldyrylǵan.
«Aǵymdaǵy jyldyń 5-shi tamyzynan 6 tamyzyna qaraǵan túni qala boiynsha tolassyz jaýǵan jaýyn-shashyn saldarynan qaladaǵy joldarǵa sý jinaldy. Jaýyn sýyn sorǵytý maqsatynda kommýnaldyq kásiporyndardan barlyǵy 4 boiler-assenizatory, 10 motopompasy jáne 2 sý sorǵysh kóligi (PNS) úzdiksiz kúni-túni qyzmet atqarýda. Qazirgi ýaqytta 31a, 31b, 32a, 32b shaǵynaýdandardyń jol qiylysy men 1 shaǵynaýdan oblystyq tis emhanasy mańy sýdan tazartylýda. Sonymen qatar, sý jinalǵan oryndardy tazalaýǵa «Qala joldary» JShS-nen 15 adam jáne Tótenshe jaǵdailar departamentinen 20 adam jumyldyryldy»,-dep habar taratty baspasóz qyzmeti.
