Mańǵystaý oblysy Politsiia departamentiniń qyzmetkerleri Aqtaýda koronavirýs juqtyrǵan adamnyń jezókshelermen bailanysyn jasyrǵany anyqtaldy. Bul týraly QR Sybailas jemqorlyqqa qarsy is-qimyl agenttiginiń Apparat basshysy Qýanysh Japaqov málim etti, dep habarlaidy "Ult aqparat".
«Mańǵystaý oblysy boiynsha departament oblystyq prokýratýramen birlese Politsiia departamenti laýazymdy tulǵalarynyń zańsyz áreketiniń jolyn kesti. Olar jezókshelikpen ainalysý úshin Aqtaý qalasy aýmaǵynda priton jelisin uiymdastyrýda shetel azamattaryna qamqorlyq jasap keldi degen kúdikke ilindi», - dedi Q. Japaqov onlain brifingide.
Onyń aitýynsha, karantin rejimine qaramastan, politsiia qyzmetkerleri pritondardyń quqyqqa qaishy qyzmetiniń jolyn kesýge negizdelgen sharalardy qabyldamaǵan. Osy oraida koronavirýs infektsiiasyn juqtyrǵan adamnyń jezókshelikpen ainalysqandarmen tikelei bailanysy faktisin jasyrǵandary anyqtaldy.
Sybailas jemqorlyqqa qarsy kúres qyzmeti paraqorlyq, laýazymdyq ókilettikti teris paidalaný, jezókshelik pritondaryn uiymdastyrý, sondai-aq adamdar ómiri men densaýlyǵyna qaýip týdyratyn jaǵdailar týraly aqparatty jasyrý faktileri boiynsha tergeý amaldaryn júrgizýde.
Qabyldanǵan sharalar arqyly 87 adam oqshaýlandy. Olardyń arasynda pritondarda jezókshelikpen ainalysqandar da bar. Tekserý barysynda eki sheteldikte koronavirýs infektsiiasy anyqtaldy.
