Mańǵystaý oblysynda kásipkerlikti damytý jáne jumys oryndaryn kóbeitý maqsatynda «Nur kapital» jobasy engizildi.
«Nur kapital» baǵdarlamasy aiasynda turǵyndardyń óz kásipterin ashý úshin oqytý jumystary júrgizilýde. Baǵdarlamanyń maqsaty – aimaq turǵyndarynyń ómir súrý deńgeiin kóterýmen qatar jumys oryndaryn kóbeitý.
Búginde jas kásip ieleri atalmysh jobanyń arqasynda birqatar jobalardy usynýda. Solardyń biri – balabaqsha búldirshinderin tsifrlyq baǵdarlama arqyly oqytý.
«Jaqynda maǵan jas kásipkerler kelip, balabaqshadaǵy oqý júiesin tsifrlyq júie boiynsha oqytý jobasyn aitty. Olardyń jobasy 10 mln teńgege baǵalanyp otyr. Jas talanttardyń bul isi quptaýǵa turarlyq. Osy jobamen olar Belorýsiiada ótken halyqaralyq olimpiadada birinshi oryndy alǵan bolatyn. Atalǵan jobalaryn oryndaý úshin qarajat bólinetin bolady. Aýyldan shyqqan osyndai jas talanttardy qoldaýymyz qajet» – dedi Mańǵystaý oblysy ákiminiń orynbasary Rýslan Sakeev.
Buǵan qosa, ol Úkimet basshysynyń atalǵan jobany qoldaǵanyn, sondai-aq ony ózge de óńirlerge engizýdi usynǵanyn aitty.
«Baǵdarlama aiasynda ashylatyn kásiporyndarǵa 1 paiyzdyq mólshermen nesie berý josparlanǵan. Joba boiynsha 3 mln teńgeden 30 mln teńge aralyǵynda nesie beriledi. Qazirgi tańda 150 joba qaralý ústinde. Nátijesinde 1400 jumys orny ashylady dep kútilýde. Bul baǵdarlamaǵa 2 mlrd teńge kóleminde qarjy bólindi. 1 paiyzdyq mólshermen nesie alyp, kásip ashqysy keletinder ózderiniń biznes josparlaryn jazyp, qatysýlaryna bolady», – dep atap ótti R. Sakeev.
Tsifrlandyrý protsesiniń keń etek alyp, barlyq salalardy qamtýdyń arqasynda óndiris oryndaryna jańa tehnologiialardyń kelýi adami faktordy azaityp otyr. Osyǵan bailanysty Mańǵystaý oblysynyń ákimdigi óndiris ornynan bosap qalǵan mamandarǵa basqa mamandyq berý maqsatynda arnaiy sabaqtardy ótkizip jatyr.
«Jańa tehnologiialardyń arqasynda jumystyń basym bóligi avtomatty túrde oryndalady. Adami faktordy azaitady. Dese de, osy jaǵdaiǵa bailanysty biz keshendi sharalardy qabyldadyq. Jumystan bosap qalǵan adamdardy ózge mamandyqqa oqyttyq», – dedi spiker.
Tsifrlyq jańashyldyqtar óndiris ónimin molaitýǵa, shyǵyn kólemin azaitýǵa múmkindik beredi. Elimizde «Tsifrlyq Qazaqstan» memlekettik baǵdarlamasy 2017 jyldyń 12 jeltoqsanynda qabyldanǵan bolatyn. Ondaǵy maqsat – áleýmettiń áleýetin arttyrý, ekonomikalyq ósimdi arttyrý, turǵyndarǵa jailylyq pen jaqsy qyzmet usyný.
