Sýret: lada.kz
Mańǵystaý oblysy politsiia departamenti Aqtaýda zańsyz qazylǵan qabirge bailanysty túsinikteme berdi, - dep habarlaidy Tengrinews.kz tilshisi.
Politsiiaǵa shaǵymdy marqumnyń týysy túsirgen.
"Bul derek QR Qylmystyq kodeksiniń 314-babynyń ("Ólgen adamdardyń máiitterin jáne olar jerlengen jerlerdi qorlaý") 1-bóligi boiynsha tirkeldi. Sotqa deiingi tergeý júrgizilip jatyr. Tergeý múddesine bailanysty basqa aqparat jariialanbaidy", - dep habarlady oblystyq DP baspasóz qyzmeti.
Eske salaiyq, buǵan deiin Aqtaý qalasynyń turǵyny Iýrii Konovalov qaitys bolǵan týysynyń jerleý rásiminen úsh saǵat ótken soń jerleý agenttigi qyzmetkerleri qabirdi qazyp, deneni alyp shyǵyp, basqa ziratqa qaita kómgenin aitqan bolatyn.
"Jerleý rásimin ótkizý úshin eki qalalyq agenttikke júgindim. Agenttikterdiń birinde Máskeýde turatyn ápkem Irina Hasanova týysqanymdy jańa ziratqa jerleýge qala syrtynan jer daiyndap qoiǵanyn bilgende, tańǵaldym. Árine, men kelispedim, óitkeni bala qalalyq ziratta anasynyń janyna jerlený kerek. Biz ápkemmen jeti jyl boiy sóilespedik, ne úshin bulai jasaǵany túsiniksiz", - dedi ol.
Onyń aitýynsha, qabirdi daiyndaýdan bas tartqannan keiin jerleý úshin arnaiy adamdar jaldaýǵa májbúr bolǵan. Marqumnyń máiitin máiithanadan alǵan Konovalov ziratqa kelip, 2020 jyldyń 15 shildesinde jerlegen. Jerlengennen shamamen úsh saǵat ótken soń, zirat direktory oǵan qońyraý shalyp, aǵasynyń qabiri qazylǵanyn aitqan.
Ol Aqtaý prokýratýrasyna aryz jazdy. Konovalovtyń aitýynsha, bul másele ilgerilemegen. Ol kúdiktiler jazadan qutylyp kete me dep alańdap otyr.
