Aqtaýda qatty jelden kólikter men úilerge zaqym keldi, dep habarlaidy QazAqparat.
Qaladaǵy 26-shy shaǵynaýdanda 41-shi úidiń kirpish qorshaýy turaqta turǵan avtokólikke qulaǵan. Odan bólek, kópqabatty úidiń syrtqy qaptama bólshekteri jaqyn mańdaǵy kólikke túsken.
Mańǵystaý oblystyq Politsiia departamentiniń aqparatyna sai, sol kúni Munaily aýdany Qyzyl-tóbe aýylynda Saǵynysh kóshesinde qatty jel saldarynan 30-shy úidiń aýmaǵyndaǵy ýaqytsha qurylystyń shatyry ushqan. Qaza bolǵandar men zardap shekkender joq. Oqiǵa saldarynan elektr jelisiniń eki tiregi zaqymdaldy. Jóndeý-qalpyna keltirý jumystaryna «Mańǵystaý aimaqtyq elektrjelilik kompaniiasy» AQ, «Mańǵystaýenergo» MKK – 7 tehnika men 27 adam jumyldyryldy. 09:00-de jóndeý-qalpyna keltirý jumystary tolyǵymyn aiaqtaldy. Tirshilikti qamtamasyz etý nysandary shtattyq rejimde jumys istep tur.
Jetibai aýylynda uqsas jaǵdai boldy. Onda qatty jelden joldyń boiyndaǵy bitpegen ǵimarattyń shatyry ushyp, joldy bógep qalǵan. Oqiǵa ornyna bir tehnika men 4 qyzmetker jiberildi.
Atap ótý kerek, bir táýlik buryn Aqtaý qalasynyń tótenshe jaǵdailar basqarmasy jeldiń kúsheiip, onyń ekpini 30 m/s-qa deiin jetetini týraly eskertti. Osyǵan bailanysty turǵyndarǵa úide otyrýǵa, al avtokólikterdi aǵashtar men senimsiz qurylystardan alys qoiýǵa keńes bergen edi.
