اقتاۋدا قاتتى جەلدەن كٶلٸكتەر مەن ٷيلەرگە زاقىم كەلدٸ, دەپ حابارلايدى قازاقپارات.
قالاداعى 26-شى شاعىناۋداندا 41-شٸ ٷيدٸڭ كٸرپٸش قورشاۋى تۇراقتا تۇرعان اۆتوكٶلٸككە قۇلاعان. ودان بٶلەك, كٶپقاباتتى ٷيدٸڭ سىرتقى قاپتاما بٶلشەكتەرٸ جاقىن ماڭداعى كٶلٸككە تٷسكەن.
ماڭعىستاۋ وبلىستىق پوليتسييا دەپارتامەنتٸنٸڭ اقپاراتىنا ساي, سول كٷنٸ مۇنايلى اۋدانى قىزىل-تٶبە اۋىلىندا ساعىنىش كٶشەسٸندە قاتتى جەل سالدارىنان 30-شى ٷيدٸڭ اۋماعىنداعى ۋاقىتشا قۇرىلىستىڭ شاتىرى ۇشقان. قازا بولعاندار مەن زارداپ شەككەندەر جوق. وقيعا سالدارىنان ەلەكتر جەلٸسٸنٸڭ ەكٸ تٸرەگٸ زاقىمدالدى. جٶندەۋ-قالپىنا كەلتٸرۋ جۇمىستارىنا «ماڭعىستاۋ ايماقتىق ەلەكترجەلٸلٸك كومپانيياسى» اق, «ماڭعىستاۋەنەرگو» مكك – 7 تەحنيكا مەن 27 ادام جۇمىلدىرىلدى. 09:00-دە جٶندەۋ-قالپىنا كەلتٸرۋ جۇمىستارى تولىعىمىن اياقتالدى. تٸرشٸلٸكتٸ قامتاماسىز ەتۋ نىساندارى شتاتتىق رەجيمدە جۇمىس ٸستەپ تۇر.
جەتٸباي اۋىلىندا ۇقساس جاعداي بولدى. وندا قاتتى جەلدەن جولدىڭ بويىنداعى بٸتپەگەن عيماراتتىڭ شاتىرى ۇشىپ, جولدى بٶگەپ قالعان. وقيعا ورنىنا بٸر تەحنيكا مەن 4 قىزمەتكەر جٸبەرٸلدٸ.
اتاپ ٶتۋ كەرەك, بٸر تەۋلٸك بۇرىن اقتاۋ قالاسىنىڭ تٶتەنشە جاعدايلار باسقارماسى جەلدٸڭ كٷشەيٸپ, ونىڭ ەكپٸنٸ 30 م/س-قا دەيٸن جەتەتٸنٸ تۋرالى ەسكەرتتٸ. وسىعان بايلانىستى تۇرعىندارعا ٷيدە وتىرۋعا, ال اۆتوكٶلٸكتەردٸ اعاشتار مەن سەنٸمسٸز قۇرىلىستاردان الىس قويۋعا كەڭەس بەرگەن ەدٸ.
