Aqtaýda kishkentai balaǵa dórekilik kórsetken tis dárigeri jumysynan bosatyldy. Bul týraly Mańǵystaý oblysynyń Óńirlik kommýnikatsiialar qyzmetinde ótken brifingte oblystyq stomatologiialyq ortalyqtyń direktory Qýat Mashyryqov málimdedi, dep habarlaidy "Ult aqparat".
Qýat Mashyryqovtyń aitýynsha, óz qyzmetin adal atqarmaǵan dárigerdiń jumysyn ary qarai jalǵastyrýyna jol berilmeidi.
Esterińizge sala keteiik, 1 qarasha kúni balanyń tisin julý kezinde qatty julqylap, oǵan qatygezdik tanytqan dárigerdiń videosy áleýmettik jelige tarap ketken bolatyn. Balanyń anasy klinikadaǵy beinebaqylaý kamerasyna túsken jazbany tekserýdi talap etken. Artynsha, meditsina qyzmetkeri videoúndeý jasap, óz kinásin tolyq moiyndaitynyn, balanyń anasynan jáne qazaqstandyqtardan keshirim suraitynyn jetkizdi.
Alaida zardap shekken balanyń anasy birden politsiiaǵa aryz jazǵan. Aqtaý qalalyq politsiia basqarmasy bastyǵynyń orynbasary Qaldymurat Aiǵaraqovtyń málimetinshe, dárigerdiń ústinen ákimshilik is qozǵaldy. Sot-meditsinalyq saraptama taǵaiyndaldy. Jasóspirimniń denesinde jaraqat bolǵan jaǵdaida QR ákimshilik quqyq buzý kodeksiniń 73/1 babymen, denesinde jaraqat bolmaǵan jaǵdaida atalǵan kodekstiń 73/2 babymen uryp-soqqany úshin ákimshilik jaýapkershilikke tartylmaq.
Atalǵan derek boiynsha QR QK 141-baby boiynsha qylmystyq is qozǵaý úshin zańdy buzǵan azamat muǵalim nemese tárbieshi bolýy kerek.
«Dáriger óte bilimdi. Jas dáriger. Minezi shapshań óte shynshyl jigit. Mektepti «Altyn belgige», al 2017 jyly M.Ospanov atyndaǵy Batys Qazaqstan memlekettik meditsina ýniversitetiniń stomatologiia fakýltetin úzdik bitirgen. Sol jyly tamyz aiynda ortalyqqa jumysqa ornalasty. 2 jyl ishinde ózin jaqsy jaǵynan kórsete bildi. Bolashaǵynan mol úmit kútetin azamat dep oilaitynbyz. Endi keshegi óreskel qylyqtaryna qarap, eńbek kodeksi 49-babynyń 5-tarmaqshasy, 56-babyna sáikes jumystan bosatý jóninde sheshim qabyldadyq», - dedi oblystyq stomatologiialyq ortalyqtyń direktory Qýat Mashyryqov.
Qýat Mashyryqovtyń aitýynsha, tis emhanasyna jaz ýaqytynda balalar óte kóp keledi.
«Qala halqynyń sany jyldan jylǵa ósýde. Biz eki mezgilde 600 adamǵa deiin qabyldaimyz. Halyq sanynyń ósýine bailanysty emhanany keńeitý jóninde usynys berdik, bolashaqta 32-shaǵyn aýdannan jańa emhana ashpaq oiymyz bar», - deidi oblystyq stomotologiia ortalyǵynyń direktory.
