Foto: gov.kz
Aqtaýda qaiǵyly jol apaty saldarynan bir jarym jastaǵy sábi kóz jumdy. Oqiǵa 13 mamyr kúni qaladaǵy 27-shaǵynaýdanda bolǵan, dep habarlaidy Ult.kz.
Aldyn ala málimet boiynsha, jol talǵamaityn kólik turǵyn úi aýlasynda oinap júrgen kishkentai balany qaǵyp ketken. Aýyr soqqydan sábi oqiǵa ornynda jan tapsyrdy.
Mańǵystaý oblystyq politsiia departamenti bul derekti rastady. Vedomstvonyń málimetinshe, qyzmettik kólik tizgininde quqyq qorǵaý organynyń qyzmetkeri bolǵan. Ol turǵyn úi aýmaǵyndaǵy jolda balany qaǵyp ketken.
Atalǵan fakti boiynsha QR Qylmystyq kodeksiniń 345-baby 3-bóligi boiynsha (kólik júrgizý qaǵidalaryn buzý, abaisyzda adam ólimine ákep soǵý) qylmystyq is qozǵaldy. Júrgizýshi ýaqytsha ustaý izoliatoryna qamaldy.
Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan tergeý amaldary júrgizilýde.
Politsiia departamenti qaza tapqan balanyń jaqyndaryna kóńil aityp, bul istiń erekshe baqylaýǵa alynǵanyn habarlady.
Aita keteiik, buǵan deiin de aýla ishinde balalardy kólik qaǵyp ketý derekteri tirkelgen bolatyn.
