Búgin Aqtaý qalasynda Almatydaǵy terrorlyq shabýyl kezinde qaza tapqan UQK Shekara akademiiasynyń kýrsanty Bitim Meiirhanmen qoshtasýǵa arnalǵan qaraly miting ótti, dep habarlaidy QazAqparat agenttigi Mańǵystaý oblysy ákiminiń baspasóz qyzmetine silteme jasap.
Aza tutý rásimine Mańǵystaý oblysynyń ákimi, memlekettik organ ókilderi, máslihat depýtattary, óńirlik shekara qyzmetiniń jeke quramy, kýrsanttyń ata-anasy men týystary, muǵalimder men qala turǵyndary qatysty.
Óńir basshysy Nurlan Noǵaev bul qazanyń Bitim áýletiniń ǵana emes, barsha qazaqtyń ortaq qaiǵysy ekenin atap ótti.
«Meiirhan Erjanuly nebári 19 jasynda Otanǵa adal qyzmet etýdiń jarqyn úlgisin kórsetip ketti. Meiirhan baýyrymyzdyń erliginiń aldynda basymyzdy iemiz. Onyń qaisarlyǵy kópke úlgi-ónege bolary sózsiz», - dedi Nurlan Noǵaev.
Memleket múddesin qorǵaýda kórsetken batyldyǵy men janqiiarlyǵy úshin Prezident Jarlyǵymen Meiirhan Bitim qaitys bolǵannan keiin III dárejeli «Aibyn» ordenimen marapattaldy. Aza tutý rásimi barysynda bir minýt únsizdik jariialanyp, aspanǵa úsh ret oq atyldy.
«Bul dúrbeleńde órimdei jastardyń qaza bolǵany janymyzǵa qatty batty. Eline qyzmet etýdi armandaǵan nemerem Meiirhan antyna adal boldy. Erjúrek balam betpe-bet kelgen ajaldan qaimyqqan joq. Mundai jaǵdaidyń endi eshqashan qaitalanbaǵanyn tileimin. Halqymyzdyń aýyzbirshiligi artyp, balalarymyz beibit kúnde ómir súrsin. Jaratqan Táýelsizdigimizdi máńgi etsin!», - dedi marqumnyń atasy Bitim Kezbaev.
