Almatyda 37 jastaǵy politsiia qyzmetkeri Aslan Álserovtiń qazasyna bailanysty qozǵalǵan qylmystyq is boiynsha tergeý jumystary aiaqtaldy. Is materialdary sotqa joldaý máselesin sheshý úshin prokýratýraǵa tapsyryldy, dep habarlaidy ult.kz.
Politsiianyń habarlaýynsha, tergeý Qylmystyq kodekstiń 99-baby 2-bóligi, iaǵni aýyrlatatyn mán-jailarda adam óltirý deregi boiynsha júrgizilgen. Alaida tergeý qupiiasyna bailanysty Ishki ister ministrligi oqiǵanyń ózge mán-jailaryn jariia etpedi.
Qaiǵyly oqiǵa 23 maýsymda Almaty oblysynda bolǵan. Kókpek – Kóktal – Kegen tasjolynyń 52-shaqyrymynda mal baǵyp júrgen turǵyn órtengen adamnyń máiitin baiqap, quqyq qorǵaý organdaryna habarlaǵan. Keiin marqumnyń Almaty qalasy Áýezov aýdandyq politsiia basqarmasynda aǵa jedel ýákil bolyp qyzmet atqarǵan Aslan Álserov ekeni belgili boldy. Onyń oń qolynan arqannyń qaldyqtary tabylǵan.
Tergeý boljamyna sáikes, er adam Almatydaǵy otbasylyq páterinde óltirilgen. Keiin qylmystyń izin jasyrý maqsatynda máiit qala syrtyndaǵy shamamen 300 shaqyrym qashyqtyqta ornalasqan taýly aimaqqa jetkizilip, órtelgen.
Atalǵan is boiynsha marqumnyń jubaiy men 14 jastaǵy uly kúdikke ilingen. Belgili bolǵandai, Álserovtiń áieli buryn politsiia qatarynda qyzmet atqarǵan. Erli-zaiypty 15 jyl otasyp, jeti bala tárbielegen.
Bastapqyda qylmystyq is Qylmystyq kodekstiń 99-baby 1-bóligi boiynsha tirkelgen. Alaida tergeý barysynda is aýyrlatatyn mán-jailarda jasalǵan adam óltirý retinde qaita saralanǵan.
Atalǵan baptyń 2-bóligi boiynsha eresek adamǵa 15 jyldan 20 jylǵa deiin bas bostandyǵynan aiyrý nemese ómir boiyna bas bostandyǵynan aiyrý jazasy kózdelgen. Al kámeletke tolmaǵan kúdiktige qatysty jaza taǵaiyndaýdyń bólek talaptary qoldanylady.
Qazirgi ýaqytta is prokýratýranyń qaraýyna berilgen. Kúdiktilerdiń kinási sot úkimi zańdy kúshine engenge deiin dáleldengen bolyp eseptelmeidi.
Aita keteiik, Órtengen politseidiń otbasylyq qupiiasy málim boldy.
Almatyda politseidi óltirý isi: buǵan deiin qandai málimetter belgili boldy?
- 24 maýsym - Politseidiń máiiti tabylyp, áieli men uly ustaldy
Almaty oblysynyń Kegen aýdanynda 37 jastaǵy politsiia qyzmetkeri Aslan Álserovtiń órtengen máiiti tabyldy. Quqyq qorǵaý organdary marqumnyń jubaiy men 14 jastaǵy uly ustalǵanyn rastady. Sol kúni politseidiń jerlengeni de habarlandy.
- 26 maýsym - Kúdiktiler sany artqany habarlandy
Qylmystyq is boiynsha kúdiktiler sany kóbeigeni belgili boldy. Buǵan deiin marqumnyń áieli men 14 jastaǵy uly kúdikke ilingen edi. Keiin tergeý aiasynda basqa da adamdardyń aty atala bastady. Olardyń qatarynda kámeletke tolmaǵan jasóspirimder de bolǵan.
- 30 maýsym - Erli-zaiyptylardyń burynǵy suhbaty tarady
Aslan men Arailym Álserovterdiń eki jyl buryn “Qaiyrly tań, Qazaqstan” baǵdarlamasyna qatysqany belgili boldy. Erli-zaiyptylar jeti bala tárbielep otyrǵan otbasy retinde tanystyrylyp, qyzmeti men otbasylyq ómiri týraly áńgimelegen.
- 2–12 shilde - Marqumnyń áriptesteri pikir bildirdi
Aslan Álserovtiń burynǵy áriptesteriniń biri onyń qylmystyq politsiiadaǵy qyzmeti týraly aityp berdi. Osy kezeńde otbasynda bolǵan janjalǵa qatysty túrli boljamdar tarady. Alaida oqiǵanyń naqty sebepteri resmi túrde rastalmady.
- 15 shilde - Jasóspirimderdiń advokattary málimdeme jasady
Iske qatysy bar jasóspirimderdiń qorǵaýshylary tergeý barysyna qatysty pikir bildirdi. Advokat Ǵalym Nurpeiisov jasóspirimderdiń biriniń oqiǵa bolǵan úige oiyn oinaýǵa barǵanyn aitty.
Sondai-aq qorǵaýshy alǵashqy jaýap alý kezinde advokat bolmaǵanyn málimdep, tergeý áreketterine qatysty shaǵymyn jetkizdi. Sol kezdegi aqparat boiynsha, úsh jasóspirim úiqamaqta bolǵan.
- 8 qazan - Tergeý aiaqtalyp, is prokýratýraǵa joldandy
Almaty qalalyq politsiia departamenti Aslan Álserovtiń ólimine qatysty sotqa deiingi tergeýdiń aiaqtalǵanyn habarlady.
Bastapqyda Qylmystyq kodekstiń 99-baby 1-bóligi boiynsha qozǵalǵan is keiin osy baptyń 2-bóligine, iaǵni aýyrlatatyn mán-jailarda adam óltirý deregine qaita saralanǵan.
Qylmystyq is materialdary prokýratýraǵa berildi. Kúdiktilerdiń kinási sot úkimi zańdy kúshine engenge deiin dáleldengen bolyp eseptelmeidi.
