Aqtaýda zańsyz qurylysty anyqtaý boiynsha monitoring jumystary bastaldy, dep habarlaidy "Ult aqparat".
Oblystyq qoǵamdyq kommýnikatsiia ortalyǵynda ótken brifingte Aqtaý qalasynyń ákimi Nurdáýlet Qilybai zańsyz salynyp jatqan qurylysqa aqsha salyp aldanǵan 200 úleskerdiń máselesine qatysty pikir bildirdi.
Onyń aitýynsha, Aqtaý qalasynyń aýmaǵynda ruqsat qujattary rásimdelmei, qurylysy bastalǵan kópqabatty turǵyn úiler bar.
Az ýaqyttyń ishinde úsh birdei turǵyn úi kesheniniń qurylysty ruqsatsyz júrgizgeni anyqtaldy. «Samǵaý», «Gaýhartas» jáne «Mahabbat» keshenderi jobaǵa sáikes kelmeidi.
Bireýi - keńse ǵimaratynyń, endi biri - avtoturaq ornyna turǵyn úi salǵan. Onymen qosa úleskerlerdi tartyp, júzdegen adamnan aldyn ala qarjy jinap alǵan.
Bir kompaniia tipti bir páterdi birneshe adamǵa satqan eken. Qazir merdiger kompaniialarǵa aldanǵandar ne baspana joq, ne aqsha joq, san soǵyp qalyp otyr. Zań talaptaryn oryndamaǵan jaýapsyz kompaniialar ústinen aryz túsirilmek.
Aqtaý qalasynyń ákimi úleskerlerge qurylysy bitpegen úilerge aqsha salmaýdy, onyń zańdy, zańsyz salynyp jatqanyn aldyn ala ákimdikten anyqtap alýdy eskertti.
«Aqtaý qalasynda ókinishke orai zańsyz túrde qurylysy júrip jatqan birneshe úi bar. Turǵyndardyń aqshasyn alyp úidi salyp bitire almai jatyr. Qarjy salǵan azamattar aryz jazýlary kerek. Keiin quqyq qorǵaý organdary qurylys salyp jatqan mekemeniń basshylaryn tekseredi. Sodan keiin tiisti sharalardy qabyldaityn bolady. Bizder ákimshilik tarapynan bei-jai qalmaimyz. Bul másele qazir tikelei oblys ákiminiń qaraýynda tur. Aldaǵy ýaqytta zańsyz qurylys júrip jatsa, olardy toqtatamyz. Bul jerde qurylys mekmelemelerimen ǵana emes, jarnama beretin mekemelermen jumys júrgizilip jatyr. Eger zańsyz qurylys bolsa, olarǵa jarnama berilmesin degen tapsyrma bar», - dedi qala ákim N. Qilybai.
Aqtaý qalalyq sáýlet jáne qala qurylysy bólimi qala aýmaǵynda salynyp jatqan qurylys nysandaryna turaqty monitoring júrgizedi.
Tiisti ruqsat qujattaryn rásimdemei qurylys-montajdaý jumystary boiynsha Mańǵystaý oblysynyń qala qurylysy jáne jerdi baqylaý basqarmasy 2018 jyly – 66 ákimshilik is qozǵap, aiyppul salǵan.
2019 jyly – 130 ákimshilik is qozǵalyp, aiyppul salyndy, 2020 jyly – 30 nysanǵa qatysty tekserý jumystaryn júrgizýge hat joldandy.
