Aqtaýda ógei ulyn óltirgen 35 jastaǵy Tursynai Sársenovaǵa qatysty sot otyrysy bastaldy. Moinyna 16 jastaǵy Nursultannyń qanyn júktegen aiyptalýshy marqumdy pyshaqtap óltirip, denesin saraiǵa tyǵyp tastaǵan eken. Tek, jasóspirimniń máiiti qańtar aiynyń basynda tabylǵan, dep habarlady KTK.
Al, qandy qol áiel qatań jazaǵa tartylýy tiis degen marqumnyń týǵan anasy ógei sheshe Nursultanǵa únemi qorlyq kórsetip kelgen dep otyr.
16 jastaǵy Nursultannyń ata-anasy osydan 10 jyl buryn dám-tuzy jaraspai ajyrasyp ketedi. Beikúná bala ájesiniń qaraýynda qalǵan. Biraq, shańyraqqa taǵy kelin túskende, ógei sheshe men bala arasyndaǵy qarym-qatynas ózgeshe órbi bastaidy. Al, baýyr eti balasynyń ólgenine áli de sengisi kelmeitin Kámshat Qojaqova, únemi qorlyq kórsetken Sársenova aqyry ulymnyń túbine jetti deidi.
"Bir ret keshirdim, tórt bala úshin. Ekinshisinde keshirim degen joq qoi. Men tek qana sottan ádil jazasyn suraimyn. Basqa eshteńe suramaimyn. Bir adam óltirgen adam, keleside de qaitalýy múmkin", — deidi Nursultannyń anasy Kámshat Qojaqova.
Kisi qanyn moinyna júktegen Tursynai Sársenova 16 jastaǵy jasóspirimdi pyshaqtap óltirgen. Tipti, qylmysyn jasyrý úshin máiitti saraiǵa tyǵyp tastaidy. Biraq, ógei sheshe qoly qanǵa malynǵanyn ertesine-aq moiyndaǵan. Al, sottalýshynyń týysqandary qaiǵyly oqiǵaǵa balanyń taǵdyryn tálkek etken eki tarap kináli dep esepteidi.
"Tursynaidyń tórt balasy bar, bir balasy múgedek. Sol tórt balasymen birge baqty. Óziniń balasyndai kórip. Oqýdan qaldyrǵan joq. Tamaǵyn ash qylǵan joq. Bul qylmys negizinde eki áieldiń eregisiniń nátijesinde bolyp otyr", — deidi aiyptalýshynyń aǵasy Yrysbai Sársenov.
Sot-psihologiialyq saraptamanyń nátijesinde qolyna kisen salynǵan aiyptalýshynyń aqyl-esi durys dep sheshim qabyldaǵan. Alaida, onyń advokaty qaita saraptama júrgizýdi surap otyr. Qorǵaýshylar onyń ashý ústinde osyndai qadamǵa barǵanyna senimdi. Biraq, ógei sheshesiniń qandy qylmysy tolyqtai dáleldense, 20 jylǵa deiin bas bostandyǵynan airylýy múmkin.
