Soltústik Qazaqstan oblysy ańshylyq týrizm úshin tartymdy. Bul týraly Qazaqstan men Reseidiń Óńiraralyq yntymaqtastyǵynyń XV forýmynda QR Mádeniet jáne sport ministri Arystanbek Muhamediuly málim etti, dep habarlaidy QazAqparat.
«Kaspii teńizindegi týrizmdi damytý úshin biyl tamyzda Aqtaýda ótken Kaspii mańy memleketteriniń tarihi sammiti eleýli úles qosty. Aqtaý sammiti barysynda memleket basshylary Kaspii teńizi aýmaǵyn damytý áleýetine qatysty usynystaryn aitty. Osy oraida atalǵan aimaqta transshekaralyq teńiz krýizderi týrister úshin asa tartymdy bolady», - dep toqtaldy A. Muhamediuly.
Onyń sózine qaraǵanda, jaqynda ornalasqan iri halyqaralyq porttar Túrkimenstanda, Ázerbaijanda, Iranda ekenin eskere otyryp, teńiz infraqurylymyn jańartý qajettiligi bar. Bul rette eki el aýmaǵynda teńiz porttarynyń jańa jolaýshylar terminaldaryn ashý kerek.
«Nursultan Ábishuly, Sizdiń tapsyrmańyz boiynsha Mańǵystaý oblysynda álemdik standarttarǵa sai jaǵajai demalys aimaqtaryn qurý jumystary bastaldy», - dedi ministr.
Budan bólek A. Muhamediuly Soltústik Qazaqstan oblysy óziniń biregei qoryqtyq aimaqtarymen ekologiialyq ári ańshylyq týrizm úshin tartymdy ekenin atap ótti.
«Álemdik úzdik tájiribege súiene otyryp, ulttyq tabiǵi parkter men qoryqtar barynsha ashyq bolǵany jón. Mysaly, Kanadadaǵy «Park Banf» ulttyq tabiǵi parki jylyna 5 millionnan astam týristi qabyldaidy. Jańa Zelandiiada ańshylyq sharýashylyqtardyń jyl saiynǵy tabysy 900 mln dollardy qurap otyr, al Ispaniiada 84 mln dollar shamasynda», - dedi vedomstvo basshysy.
Osy oraida ol bul baǵytta túsken qomaqty qarjy parkterdi damytýdy, sondai-aq bioresýrstardy qalpyna keltirýdi qamtamasyz etetinin jetkizdi. Bul turǵyda aldaǵy jyldan bastap Aýyl sharýashylyǵy ministrligimen birlese ańshylyq alqaptar men ulttyq parkterdi basqarýdyń jańa modelin aprobatsiiadan ótkizý josparlanyp otyr.
