Indýstriia jáne infraqurylymdyq damý vitse-ministri Berik Qamaliev Aqtaý men Quryq porttarynan qansha júk tasymaldanyp jatqanyn aitty, dep habarlaidy QazAqparat.
««Nurly jol» baǵdarlamasyn júzege asyrý – bizge Kaspiide úzdik logistikalyq habty qalyptastyrýǵa múmkindik berdi. Búgingi tańda bizdiń Aqtaý, Quryq teńiz porttarynyń qýaty 27 mln tonnany quraidy. Biz osyndai mólsherdegi júkti ótkize alamyz. Atap aitqanda Aqtaý portynan 21 mln tonna, Quryqtan 6 mln tonna júk ótedi. Olar arqyly kóbinese munai, munai ónimderi, bidai, metall, ónerkásiptik ónimder, qurylys materialdary tasymaldanady», - dedi Berik Qamaliev Parlament Májilisinde keme qatynasy týraly kelisimdi ratifikatsiialaý jónindegi zań jobasyn tanystyra otyryp.
Onyń aitýynsha, biyl pandemiiaǵa qaramastan porttardyń qarqyny saqtalǵan.
«Biz 9 aidyń ishinde tipti 4,5 mln tonna artyq júk ótkizdik. Bul – ótken jyldyń sáikes kezeńimen salystyrǵanda 4 paiyzǵa artyq. Jyl sońyna deiin qarqyndy saqtap qalǵymyz keledi. Alaida bul rette teńiz porttarynyń tolyq qýatta jumys istep turmaǵanyn da atap ótý kerek. Bul - munai óndirý kóleminiń qysqarýyna bailanysty. Mysaly 2011 jyly biz Aqtaý porty arqyly shamamen 10 mln tonna munai jiberetinbiz. Qazir bul kórsetkish – 2 mln tonnany quraidy. Sebebi jóneltiletin munai kóleminiń kóbi qubyr arqyly jetkiziletin boldy. Sonymen qatar Iranǵa qatysty sanktsiialyq sharalar da óz áserin tigizdi. Bizdegi «ArselorMittal Temirtaý» kompaniiasy jyl saiyn 2 mln tonnaǵa jýyq metall tiep jiberetin. Osyndai faktorlar álbette óz áserin tigizdi», - dedi ol.
Berik Qamaliev atalmysh porttardaǵy júkti «konteilendirý» jumysy júrgizilip jatqanyn jetkizdi.
«Qazirgi tańda Transkaspii jańa halyqaralyq baǵdary boiynsha Aqtaý-Baký baǵytynda jóneltiletin 20 puttyq konteinerlerdiń sanyn 20 myńnan 40 myńǵa deiin arttyrdyq. «Qazmortransflot» kompaniiasynyń júk tasymalyn 52 paiyzǵa jetkizdik. Biz «Qazaqmys», «Qazmyrysh», «Qazaqstan alliýminiii» kompaniialarynyń júkteriniń eksportyn konteinerlindirmekpiz. 40 myń konteiner – maqsatymyzdyń shegi emes. 2025 jylǵa deiin 130-140 myń konteinerge deiin júk tasymalyn arttyrǵymyz keledi», - dedi ol.
