Foto: TASS
Aqtaý mańynda apatqa ushyraǵan Azerbaijan Airlines kompaniiasynyń jolaýshylar ushaǵynda qaza tapqandardy eske alý maqsatynda Sheshenstan astanasy Groznyi qalasynda memorial ashyldy. Eskertkish Ázerbaijannyń tuńǵysh prezidenti Geidar Áliev atyndaǵy saiabaqta ornatylǵan. Bul týraly Ult.kz TASS agenttigine silteme jasap habarlady.
Memorialdyń ashylý saltanatynda Sheshenstan basshysy men úkimeti ákimshiliginiń jetekshisi Galas Taimashanov apattan qaza tapqandardyń jaqyndaryna kóńil aitty.
«Bul áýe apaty barlyǵymyz úshin aýyr habar boldy. Búgin biz Baký – Groznyi baǵytyndaǵy reis jolaýshylarynyń qurmetine memorialdyq taqta ashyp otyrmyz. 29 adamnyń ómirin saqtap qalýǵa múmkindik bergen ushqyshtar men ekipajdyń erligi eshqashan umytylmaidy», – dedi ol.
Is-shara barysynda AZAL áýe kompaniiasynyń prezidenti Samir Mýsa ogly Rzaevqa Sheshen Respýblikasynyń aldyndaǵy eńbegi úshin medal tabystaldy. Sondai-aq tiri qalǵan bortserikter Asadov Zýlfýgar men Ragimli Aidannyń kórsetken erligi erekshe atap ótildi.
Eske salaiyq, 2024 jylǵy 25 jeltoqsanda AZAL áýe kompaniiasynyń Baký – Groznyi baǵytyndaǵy ushaǵy Aqtaý mańynda apatqa ushyraǵan bolatyn. Ushaq bortynda 67 adam bolǵan, olardyń 38-i qaza taýyp, 29-y aman qalǵan edi.
