Qyzmettik kólikpen Aqsý qalasyna naýqasty jetkizip salyp, qaitar jolynda jol apatyna túsken dáriger kóz jumdy, dep habarlaidy "Ult aqparat" Pavlodarnews.kz saityna silteme jasap.
Oblystyń politsiia departamentiniń baspasóz qyzmetiniń habarlaýynsha, óńirde jol apatynan eki adam kóz jumǵan.
«3 tamyz kúni saǵat 23:45-te «Omby-Maiqapshaǵai» tasjolynyń 380-shi shaqyrymynda, Chernoiarka aýylynyń mańynda 32 jastaǵy Nissan Patrol-dyń júrgizýshisi «ÝAZben» soqtyǵysqan. 25 jastaǵy «ÝAZdyń» júrgizýshisi aýyr jaraqattan sol jerde kóz jumdy», dep málimdedi Pavlodar oblysy politsiia departamenti bastyǵynyń birnishi orynbasary Jasqairat Qaiyrov.
Densaýlyq saqtaý basqarmasynyń baspasóz qyzmeti qaitys bolǵan er adamnyń Chernoretsk dárigerlik ambýlatoriiasynyń dárigeri ekenin rastady. Ol Aqsý qalasynda naýqasty aýrýhanaǵa jatqyzǵannan keiin qaityp kele jatqan.
Politsiia ekinshi qaiǵyly oqiǵa jaily da málimdedi. 6 tamyz kúni saǵat 23:15-te sol joldyń 561-shi shaqyrymynda, Sharbaqty aýylynyń mańynda Nissan X-Trail-diń 68 jastaǵy júrgizýshisi jaiaý júrginshini qaǵyp ketken. 31 jastaǵy áiel taksi toqtatý úshin joldyń kólik júretin bóligine júgirip shyqqan. Ol da oqiǵa ornynda kóz jumdy.
Eki jaǵdaida da sot-meditsinalyq saraptama taǵaiyndaldy, kólikter arnaiy aiyppul turaǵyna qoiyldy.
Politseilerdiń aitýynsha, osy jyldyń basynan beri Pavlodar oblysynda 278 jol-kólik oqiǵasy bolǵan, saldarynan 20 adam qaitys bolyp, taǵy 410 adam túrli jaraqat alǵan.
