Kaspii qubyr konsortsiýmynda jóndeý jumysy qalai júrip jatyr? Atalǵan saýalǵa elimizdiń Energetika ministri Bolat Aqsholaqov jaýap berdi, dep habarlaidy QazAqparat.
«Kaspii qubyr konsortsiýmynyń jumysy sońǵy ýaqytta ózekti másele bolyp otyr. Jóndeý jumystary osy aidyń sońyna deiin jalǵasady. Bizde qajettiniń bári bar, jumys júrip jatyr. Osydan bir jarym apta buryn súńgýir jabdyqtarynyń jetkiliksizdigine bailanysty másele týyndady. Óitkeni barlyǵy sýdyń astynda. Qajetti jabdyqtar jetkizildi. Jumys jalǵasýda, keshe ǵana áriptesterimmen sol jaiynda sóilestik. Qazan aiynyń sońynda, 25-nen keiin ailaqta ornalasqan shyǵarmaly qurylǵy (AShQ) qosymsha shiske qosylatyn bolady», - dedi Bolat Aqsholaqov OKQ-de ótken brifingide.
Vedomstvo basshysynyń málimdeýinshe, Kaspii qubyr konsortsiýmy tehnikalyq turǵydan 20 jyldan beri jumys istep keledi.
«Ýaqyt ótken saiyn jóndeý jumystary júrgizilip keledi. Mehanikalyq turǵydan alǵanda ár jabdyqtyń qoldaný shegi bar. Aita ketetini, jóndeý jumystary tolyǵymen júrip jatyr. Soǵan qaramastan konsortsiým jumysy uzaq merzimge toqtaǵan joq. Bizdegi bar ailaqta ornalasqan shyǵarmaly qurylǵy (AShQ) biylǵy óndiristi Qazaqstan úshin tolyǵymen eksporttaýǵa múmkindik beredi. Eki qurylǵy bul 100-120% qýat, al úshinshisi únemi rezervte turady. Osyǵan bailanysty biz aldaǵy jyldary Kaspii qubyr konsortsiýmynyń óndiris josparyna túzetý engizýdi qalamaimyz. Iaǵni 2023 jyly – 92 mln tonnadan astam, al 2025 jylǵa qarai 100 mln tonna jáne odan kóp ónim alý», - deidi ol.
