QR Premer-ministriniń orynbasary Berdibek Saparbaev memlekettik jáne quqyq qorǵaý organdary basshylarynyń, oblystardyń, Nur-Sultan, Almaty jáne Shymkent qalalary ákimderiniń orynbasarlarynyń qatysýymen balalar qaýipsizdigin qamtamasyz etý máseleleri boiynsha selektorlyq keńes ótkizdi. Bul týraly Úkimet basshysynyń baspasóz qyzmeti habarlady.
QR bilim jáne ǵylym vitse-ministri Sholpan Karinovanyń bergen málimetine sáikes, osy jyldyń 10 aiynda respýblikada kámeletke tolmaǵandarǵa qatysty 1931 qylmys tirkelgen, bul ótken jyldyń sáikes kezeńindegi deńgeimen birdei. Ósim Almaty qalasynda – 46,6%, Jambyl – 27,8%, Atyraý – 23% oblystarynda baiqalady.
Vitse-ministr balalardyń qaýipsizdigin qamtamasyz etý sharalarynyń biri — bilim berý mekemelerin beinekameralarmen jabdyqtaý ekenin atap ótti. Osylaisha, mektepke deiingi mekemelerdiń 74,5%-y jáne mektepterdiń shamamen 80%-y beinebaqylaý júielerimen jabdyqtalǵan. Qamtamasyz etýdiń tómen paiyzy Soltústik Qazaqstan oblysynda, Aqmola jáne Qostanai oblystarynda baiqalady.
Sonymen qatar, mektepterdiń 33% astamynda aýla dárethanalary bar. Atap aitqanda, Túrkistan oblysynda mpektepterdiń 60,3%, Jambyl oblysynda — 59,7%, Almaty oblysynda — 54,6%. Balalardy tasymaldaý úshin qosymsha 186 mektep avtobýsy qajet.
Sonymen birge, Sholpan Karinova balalar sýitsidi, balalardyń qazasy men jaraqattanýy týraly birqatar suraqtarǵa toqtaldy. Osy problemalardy sheshý úshin kámeletke tolmaǵandardyń quqyǵyn qorǵaýdy kúsheitý, turmystyq zorlyq-zombylyqpen kúresý jáne jasóspirimder arasyndaǵy sýitsidtik máselelerin sheshý boiynsha Jol kartasy jasalyp jatyr.
Atap aitqanda, ata-analardyń jaýapkershiligin jáne mekteptegi psihologiialyq qyzmettiń jaýapkershiligin arttyrýdy, áielder men balalarǵa qatysty zorlyq-zombylyq úshin jaýapkershilikti qataitýdy, bilim berý mekemeleri men balalar jappai baratyn oryndardyń janynda jol qozǵalysy erejelerin buzýshylyqty foto jáne videoǵa túsirýdiń statsionarlyq júielerin qamtamasyz etýdi qarastyrady.
Sondai-aq, balalar attraktsiondary men batýttaryn ornatý, paidalaný jáne olardyń tehnikalyq jaǵdaiy úshin jaýapkershilikti arttyrý kútilýde.
Ishki ister ministriniń orynbasary Arystanǵali Zapparov kámeletke tolmaǵandardyń jynystyq qol suǵylmaýshylyǵyna qarsy qylmystar 4%-ǵa, onyń ishinde zorlaý 40%-ǵa jáne seksýaldyq sipattaǵy zorlyq-zombylyq 24%-ǵa óskenin atap ótti.
Kámeletke tolmaǵandarǵa qatysty zorlyq-zombylyq qylmysynyń artýy BQO-da 140%, Pavlodar oblysynda — 75%, Qostanai oblysynda — 54%, Almaty oblysynda — 49%, Jambyl oblysynda — 28%, Aqmola oblysynda — 17% qurap otyr.
Mundai qylmystardyń 75%-ǵa jýyǵyn jaqyn-jýyqtary jasaidy: ógei ákeleri, ákeleri, birge turyp jatqan adamy, týystary, kórshileri men tanystary. Al ata-analar bolsa quqyqtyq saldarynan qashyp, bul faktiler týraly quqyq qorǵaý organdaryna habarlamaidy, - dedi Arystanǵali Zapparov.
Onyń aitýynsha, jasóspirimder arasyndaǵy qylmys jyl saiyn orta eseppen 6%-ǵa tómendep keledi, al biylǵy jyldyń ótken kezeńinde 9%-ǵa azaiǵan.
Barlyq qylmystardy derlik mektepter men kolledjderdiń oqýshylary jasaidy - 88%. Oqýshylardyń jasaǵan qylmystarynyń ósýi Jambyl oblysynda 30%, Mańǵystaý oblysynda - 18%, Qyzylorda oblysynda - 13% tirkeldi. Oqý mekemeleriniń qabyrǵasynda 15 qylmys jasaldy, - dedi ol.
Sonymen qatar Arystanǵali Zapparov oqý mekemelerinde qaýipsizdik deńgeiin arttyrý qajettigine nazar aýdardy.
Elimiz boiynsha mektepterdiń tek 8% nemese 535 mektep kúzet firmalarymen kelisimshart jasasqan. Qalǵan mektepterde kúzet qyzmetin vahterler, al kóp jaǵdaida olar – zeinetkerler, atqarǵan. Aqtóbe, Almaty, Atyraý, Jambyl, Qaraǵandy, Qyzylorda, Mańǵystaý, Pavlodar, Soltústik Qazaqstan oblystary jáne Shymkent qalasynda kúzet firmalarymen birde-bir kelisimshart jasalmaǵan, - dedi ol.
Mektep aýmaǵynda quqyqtyq tártipti saqtaý úshin mektep politsiia inspektorlary birligi engizilgen, qazir olardyń sany 2 myńnan asady. Biraq taǵy sonsha maman jetispeidi.
Sóz óilegenderdiń baiandamalaryn tyńdaǵan soń Berdibek Saparbaev balalarǵa qatysty bul qaiǵyly jaǵdailardyń jaýapty memlekettik organdardyń úilesimdi, aldyn alý jáne júieli jumystardyń júrgizbeýiniń saldary ekenin aitty.
Bizdiń balalarymyzdyń qaýipsizdigi - biz úshin árqashan birinshi orynda. Másele mynada, biz órt sóndirý komandasy siiaqty jumys isteimiz, qaiǵyly jaǵdai oryn alǵan soń baryp qarbalasamyz. Eń qolaily jaýap – aqsha joq. Biraq, bizdiń problemalarymyzdy sheshkisi kelmeitin basshylar ǵana osylai jaýap beredi. Barlyq ákimderge kelesi jyldyń 1 qyrkúiegine deiin mektepterdi jyly dárethanalarmen jáne beinebaqylaý júiesimen jabdyqtaý, mamandandyrylǵan arnaiy kúzetpen qamtamasyz etý tapsyryldy, - dedi Berdibek Saparbaev.
Sonymen qatar 2020 jyldyń 1 naýryzyna deiin Ishki siter, Bilim jáne ǵylym ministrlikterine, sonymen qatar jergilikti atqarýshy organdarǵa mektepterdi ishki rezervter esebinen politsiia inspektorlarymen qamtamasyz etý máselesin sheshý tapsyryldy. Vitse-premer elektr jelileri men transformatorlardy qorshaý, bilim berý mekemeleriniń perimetri boiynsha qorshaýlar ornatý, joldardaǵy balalar qaýipsizdigi sharalaryn kúsheitý, azamattardyń áleýmettik álsiz sanattaryndaǵy turǵyn úilerdiń gaz analizatorlary men gaz datchikterimen jaraqtandyrý jáne t.b. máselelerge nazar aýdardy.
Sonymen qatar, keńeste jalaqy boiynsha bereshekti óteý, áleýmettik aýdarymdardy ýaqytyly qamtamasyz etý, meditsinalyq qyzmetter men dári-dármekterdiń sapasy máseleleri qaraldy.
