Naýryz merekesine orai Nur-Sultannan Almatyǵa bet alǵan bir top jolaýshy, esigi jabylmaityn, tastai sýyq ári qarańǵy vagondarǵa tap bolǵan, - dep habarlaidy Tengrinews.kz agenttigi "Astana" telearnasyna silteme jasap.
Telearna málimetinshe, oqiǵa 18-naýryzda elordadan Almatyǵa shyqqan №204 qosymsha poiyzda bolǵan. Túngi saǵat 22:40-ta vagonǵa otyrǵan jolaýshylar jaryq júrgen soń qosylady dep oilaǵan. Biraq qara túnek jol boiy jalǵasqan. Qatty sýyqtan vagonnyń jan-jaǵynan sýyq jel úrlep, edenge muz qatqan. Jolaýylardyń sózine, vagonda jaǵatyn kómir de bolmaǵan.
"Vagon óte sýyq. Syrt kiimmen uiyqtadyq. Dárethana daladaǵydan beter las ári sýyq. Jaryq joq. Túnde tas qarańǵy. Biz biletti bir ai buryn satyp aldyq. Baǵasy men vagonnyń jaǵdaiy múldem sáikes kelmeidi. Qazirgi kezde osyndai tozyǵy jetken vagondar júredi dep oilamaǵam. Tipti kómir joq. Merekelik kóńil-kúiimizdi buzdy. Bilet qunyn qaitaryp, moraldyq ótemaqy tólesin", - deidi jolaýshy Sániia Qurbanova.
Poiyz basshysy Uljan Mamyrova da bul jaǵdaidy rastaǵan. Mereke kezinde vagon jetispeýshiliginen, qysqa esh daiyndyǵy joq vagondar jolǵa shyqqan.
"Mende qazir 19 vagon kele jatyr. Sonyń 3 vagony osyndai bolyp tur. Úsh vagonynda jylýy kishkene nashar bolyp kele jatyr. Sebebi qysqa daiyndalmaǵan vagondar salqyn bolyp jatyr. Vagonnyń sapasy óte tómen bolyp tur", - deidi ol.
"Qazaqstan Temir Joly" kompaniiasynyń ókili Mádi Muhametqalidiń sózinshe, esh jaǵdai jasalmaǵan vagondarmen tasymaldanǵan bul jolaýshylarǵa aqsha qaitarylmaidy. Merekede suranys kúrt ósken soń, jolaýshylardy dittegen jerge aman jetkizý basty maqsat bolǵan. Búginde jolaýshylar tasymalynyń bazasynda 2000-nan asa vagon bar. Onyń ishinde zaýyttan shyqqanyna 44 jyl bolǵan vagondar da kezdesedi. Mundai sanattaǵy vagon sany 800.
"Osy poiyz óz parkine kelgennen keiin tekseris jumystaryn júrgizemiz. Eger tekseris jumystarynda qatelikter dáleldenip jatsa, arnaiy sharalardy qabyldaityn bolamyz. Biraq ótemaqy zańnamada qarastyrylmaǵan. Jolaýshylar tasymalynda poiyz keshigip kelgen jaǵdaida ǵana úsh paiyz ótemaqy tólenedi", - deidi "QTJ" ókili.
VIDEO
