Qazaqstan Respýblikasy Premer-Ministriniń birinshi orynbasary – Qazaqstan Respýblikasynyń Qarjy ministri Álihan Smaiylov qolma-qol aqsha aýdarymdaryna qatysty pikir bildirdi.
Qarjy ministriniń aitýynsha, aqsha aýdarymdary kezinde qosymsha tólemder men salyqtar alynbaidy.
«Jeńildigi men qolailylyǵyna, komissiialardyń bolmaýyna bailanysty jedel aýdarymdar halyq pen biznes arasynda úlken tanymaldyqqa ie. Árine, Qazaqstan Respýblikasynyń Qarjy ministrligi qolma-qol aqshasyz tólemderdiń ósýi kóleńkeli ekonomikanyń tómendeýine yqpal etetindigin jaqsy túsinedi. Osy oraida, aýdarym kezinde qosymsha tólemder nemese salyqtar alynbaityǵyn atap ótkim keledi. Ásirese, jeke tulǵalardyń qolma-qol aqshasyz aýdarymdaryn tekserý josparlanyp otyrǵan joq», - deidi Qazaqstan Respýblikasynyń Qarjy ministri Álihan Smaiylov.
Sondai-aq biznes ókilderi de bul jaǵdaidan syrt qalmaidy. Olarǵa júktelegen mindetemeler keler jyldyń 1 qańtarynan bastap júzege asady.
«Kásipkerlikke keletin bolsaq, ol ashyq bolýy kerek. Atap aitqanda, kásipkerler zańǵa sáikes fiskaldy chekterdi berýge, 2020 jyldyń 1 qańtarynan bastap onlain kassalyq-baqylaý mashinalardy qoldanýǵa mindetti. Sonymen qatar, Kaspi-di kásipkerlik maqsatta paidalanatyn kásipkerler de negizgi mindettemelerden bosatylmaidy. Tutynýshynyń quqyǵyn qorǵaýda túbirtektiń bolýy asa mańyzdy», - deidi Qazaqstan Respýblikasynyń Qarjy ministri.
Qazirgi tańda Qazaqstan Respýblikasynyń Qarjy ministrligi aqsha aýdarymynyń jedel júiesin óz biznesinde qoldanǵan kásipkerlerdiń kirisin ákimshiliktendirý máselesin pysyqtaýda. Máselen, onlain kassalyq-baqylaý mashinalary men avtomatty túrde toltyrý jáne salyq esebin jóneltý fýnktsiiasy bar POS-terminaldardy biriktirý arqyly kiristi ákimshiliktendirýge bolady. Mundai pilottyq jobany QR Qarjy ministrligi men Kaspi bank kelesi jyly birlesip júzege asyrmaq.
«Sonymen qatar, Memleket basshysynyń tapsyrmasyna sáikes 2020 jyldyń 1 qańtarynan bastap patent nemese jeńildetilgen deklaratsiia syndy arnaiy salyq rejimderin qoldanatyn shaǵyn jáne orta biznes ókilderi 3 jylǵa salyq tóleý men tekserýlerden bosatylatyndyǵyn atap ótkim keledi», - deidi Qazaqstan Respýblikasynyń Qarjy ministri Álihan Smaiylov.
Osy oraida, Qarjy ministri turǵyndardyń aqsha aýdarymdaryna bailanysty alańdaýyna negiz joq ekenin aitady.
