AQSh istrebiteli Siriiada, Rakka qalasynyń ońtústiginde "Islam memleketi" (IM) ekstremistik uiymymen soǵysyp jatqan kóterilisshil topqa shabýyl jasaǵan úkimet kúshteriniń ushaǵyn atyp túsirdi. AQSh bastaǵan koalitsiia ókilderiniń málimdeýinshe, ushaq "áskeri is-qimyl júrgizý erejelerine sáikes jáne ujymdyq ózin-ózi qorǵaý qajettiliginen" atyp túsirilgen.
"Siriia biliginiń Sý-22 ushaǵy el demokratiialyq kúshteriniń jasaqtary ornyqqan aýdandy bombalap júrdi. Osyǵan bailanysty urys júrgizý erejelerine sai jáne koalitsiianyń ujymdyq ózin-ózi qorǵaý qajettigi týyndap, ushaq dereý atyp túsirildi" delingen resmi málimdemede. Negizinen kúrd jasaqtarynan quralǵan jáne AQSh qoldaityn bul top IM men Bashar Asad áskerine qarsy soǵysady.
Siriia úkimet kúshteriniń áskeri qolbasshylyǵy ushaqtyń jerge qulap, ushqysh iz-túzsiz joǵalǵanyn habarlady. Qolbasshylyq taratqan málimdemede "Bul - armiianyń odaqtastarmen birge el aýmaǵyndaǵy terrorizmmen kúrese alatyn birden-bir kúsh retindegi kúsh-jigerin muqaltý úshin jasalǵan shabýyl. Shabýyl armiia men odaqtastar IM-ge qarsy soǵysta kádimgidei alǵa ilgerilegen kezde jasalyp otyr" delingen.
