AQSh-tyń jańa prezidenti Donald Tramp álem jurtshylyǵyna sóz arnady, - dep habarlaidy kaz.tengrinews.kz tilshisi.
"Amerikanyń múddesin joǵary qoisaq ta, álemge aitqym keletini, biz barlyǵymen de birge bolamyz. Árbir halyqpen, árbir ultpen ózara túsinistik tabamyz. Bul qaqtyǵys emes, seriktestik bolady", - dep atap ótti Donald Tramp óz jaqtastarynyń aldynda sóilegen sózinde.
"Maǵan qazir ǵana Hillari Klinton telefon soqty. Ol meni jeńiske jetýimmen quttyqtady. Men ony jáne onyń otbasyn osynaý qiyn sailaý kampaniiasyndaǵy kúresýimen quttyqtadym. Hillari óz ómirinde uzaq ýaqyt jumys istedi. Onyń elimizge kórsetken qyzmeti úshin alǵys bildirýimizge bolady", - dedi AQSh-tyń jańa prezidenti.
Donald Tramptyń pikirinshe, endi "Amerika bólinýshilikti qoiýy kerek" jáne "ultty qaita qurý kerek".
"Demokrattar men respýblikalyqtar bir ultqa birigýi tiis. Ýaqyt jetti. Elimizdiń barlyq azamaty, barlyq amerikalyqtyń prezidenti bolýǵa ant beremin. Bul men úshin óte mańyzdy. Buǵan deiin meni qoldamaǵandar, sizden kómek suraimyn, biz birigip jumys istep, elimizdi biriktire alamyz. Osyǵan deiin de aitqanymdai, bizde kampaniia emes, quddy bir qozǵalys boldy. Óz jumysyna berilgen, ózderi úshin, óz otbasy úshin kúresken erler men áielder. Bul qozǵalys bilik halyq úshin jumys isteýi kerek dep esepteitin barlyq ulttaǵy amerikalyqtardy, dini senimderdi qamtidy. Solai bolady da. Jumysty birge istei kele, biz ultymyzdy qaita quramyz", - dedi Tramp.
AQSh-tyń 45-shi prezidenti jańa jumys oryndaryn, jańa infraqurylymdy jáne kóptegen elmen qarym-qatynasty jaqsartýdy ýáde etti.
"Biz zor múmkinshilikterimizdi paidalanbadyq, osy baǵytta jumys isteimin, bar múmkindigimizdi paidalanamyn. Árbir amerikalyq óz múmkindigin júzege asyra alady. Nazarsyz qalyp qoiǵan turǵyndarymyz endi nazarsyz bolmaidy. Infraqurylymmen ainalysamyz, joldar, kópirler, qalalar jańarady. Milliondaǵan adam jumyspen qamtylady. Sońǵy 18 aida kóptegen ardagerimizdi kórdim. Bul men úshin úlken qurmet. Olar - uly adamdar. Daryndarymyzdy kóbeitemin, daryndarymyz halqymyzdyń ál-aýqatyn jaqsarý úshin qyzmet etetindei jaǵdai jasaimyz. Ekonomikamyzdyń damýyna naqty josparymyz bar, barlyq elmen túsinisip, qarym-qatynasymyzdy jaqsartýǵa den qoiamyz. Eshbir arman oryndalmai qalmaýy kerek, eshbir syn biz úshin aýyr bolmaýy kerek, bárinen de ótemiz. Amerika tek úzdikke qol jetkizedi. Halqymyzdyń taǵdyry oń qadam basatyndai jaǵdai jasaimyz. Biz halqymyzdyń bolashaǵy jarqyn bolýyr armandadyq, osy maqsatta alǵa júremiz", - dedi Donald Tramp.
