24-25 qazan aralyǵynda AQSh-tyń Saýda ministri Ýilber Ross Qazaqstanda bolyp, Memleket basshysy jáne Úkimet múshelerimen kezdesedi. Bul týraly QR SIM-de ótken baspasóz máslihatynda vedomstvonyń resmi ókili Aibek Smadiiarov málim etti, dep habarlaidy "Ult aqparat".
«Qazaqstan Prezidenti Nursultan Nazarbaevtyń 2018 jyldyń qańtar aiynda AQSh-qa resmi saparynyń nátijesinde qol jetkizilgen ýaǵdalastyqtarǵa sáikes ústimizdegi jyldyń 24-25 qazan aralyǵynda AQSh-tyń Saýda ministri Ýilber Rosstyń Qazaqstanǵa sapary bolady. Sapar sheńberinde Qazaqstan-AQSh arasyndaǵy saýda-ekonomikalyq jáne investitsiialyq yntymaqtastyq perspektivalaryn talqylaý josparlanýda. Sapar barysynda Ýilber Rosstyń Memleket basshysy jáne Úkimet múshelerimen kezdesýi, sondai-aq Astana jáne Almaty qalalarynda eki eldiń isker toptary ókilderiniń qatysýymen qazaqstandyq-amerikalyq biznes-forýmdar uiymdastyrylady», - deidi Aibek Smadiiarov.
QR SIM resmi ókiliniń aitýynsha, AQSh-tyń Saýda ministriniń Qazaqstanǵa sapary ekijaqty qatynastar tarihyndaǵy alǵashqy sapar bolyp otyr. Bul sapar eki eldiń arasyndaǵy strategiialyq áriptestikti, sonyń ishinde saýda jáne ekonomika, investitsiia salalaryn odan ary damytýǵa yqpal etedi.
«Aita ketetin jait, statistikaǵa sáikes, 2017 jyly Qazaqstannyń AQSh-pen saýda kólemi 1 mlrd 518 mln AQSh dollaryn qurady. Sonyń ishinde Qazaqstannyń AQSh-qa eksport kólemi 354,6 mln AQSh dollaryn qurasa, AQSh-tyń Qazaqstanǵa import kólemi 1 mlrd 164 mln AQSh dollaryn qurady. 2018 jyldyń qańtar-tamyz ailarynyń aralyǵynda eki eldiń arasyndaǵy saýdanyń kólemi 1 mlrd 462 mln AQSh dollaryna jetti. Bul kórsetkish 2017 jyldyń uqsas kezeńimen salystyrǵanda 29 paiyzǵa joǵary», - deidi ol.
Eske sala keteiik, Qazaqstan Prezidenti osy jyldyń 16-18 qańtarynda Amerika Qurama Shtattaryna resmi saparmen barǵan bolatyn. Onda Nursultan Nazarbaev AQSh Prezidenti Donald Tramppen kezdesken edi. Sondai-aq AQSh-tyń resmi jáne isker toptar ókilderimen kezdesý ótkizdi. Nátijesinde quny 7 milliard teńgeni quraityn 20-dan astam kelisimge qol qoiyldy.
