Amerikanyń Kievte jumys isteitin joǵary laýazymdy diplomaty Donald Trampqa impichment jariialaý týraly tergeý isi barysynda AQSh Kongresinde kýálik etti. Burynǵy ofitser jáne diplomat Ýiliam Teilor qazir Kievtegi AQSh dimlomatiialyq missiiasyn basqarady. Ol ókilder palatasynyń úsh komitetindegi jabyq tyńdaýda sóiledi.
Ol Tramp ákimshiliginiń Ýkrainaǵa qatysy bar qadamdaryna, sonyń ishinde Ýkraina qaýipsizdigine berilýi tiis kómektiń toqtap qalǵanyna Teilordyń kelispeitini týraly ózge kýálerdiń habarynan keiin shaqyrylǵan.
Teilordyń kirispe sózinen dáiek keltirgen The New York Times pen The Washington Post habaryna qaraǵanda, diplomat Ýkrainaǵa beriletin AQSh-tyń kómegin Tramp Ýkrainanyń AQSh prezidentiniń saiasi qarsylastarynyń isin tekserýge qanshalyqty daiyn ekenimen bailanystyrmaq bolǵan. Bul aiypty Tramp birneshe ret teriske shyǵaryp, "prezidentti qinaýǵa tyrysý" dep baǵalaǵan.
Málimdeme mátinine qaraǵanda, Teilor Tramptyń Ýkrainaǵa qatynasy resmi arnalardy ainalyp ótip, beiresmi saiasat turǵysynan júrgizgen.
Diplomat Tramptyń nietin "Ýkrainanyń AQSh-taǵy prezident sailaýyna aralasqany" jaily teoriiany taratyp júrgen Tramptyń jeke advokaty Rýdi Djýliani de qoldaǵanyn atap ótken.
Prezidentke impichment jariialaý isinde Teilordyń kýá retinde paida bolýy - Trampty bilikten taidyrýǵa baǵyttalǵan kezekti áreket» dep jazady Reuters Agenttigi.
AQSh-tyń demokrattar basqaratyn ókilder palatasy Tramp pen Ýkraina prezidenti Zelenskiidiń 25 shildedegi telefon áńgimesin egjei-tegjeiin tekserip jatyr. Amerikalyq basylymdar Tramptyń Zelenskiidi 2020 jylǵy sailaýda óziniń bas qarsylasy bolatyn Djo Baidenniń ústinen jemqorlyq daýy boiynsha is qozǵaýǵa májbúrlemek bolǵanyn jazdy. Synshylar Tramp "qyzmettik ókiletin asyra paidalanyp, yqtimal qarsylasyna kompromat tabýǵa tyrysty" dep aiyptady. Donald Tramp bul aiyptaýlardy joqqa shyǵardy.
Tramp pen Zelenskii arasyndaǵy áńgime belgili bolǵannan keiin AQSh ókilder palatasyndaǵy demokrattar Trampqa "bergen sertin buzǵany úshin" impichment jariialaý protsesin bastaǵan. Buǵan deiin Ýkraina prezidenti Vladimir Zelenskii Tramptyń qysym jasamaǵanyn aitqan.
