AQSh-tyń tórt shtatynda prezident sailaýynda berilgen daýystardy sanaý áli júrip jatyr. Sońǵy málimetterge qaraǵanda barlyǵynda Demokratiialyq partiia ókili Djo Baiden azdaǵan basymdyqpen alda keledi. Biraq eki kandidat arasyndaǵy qashyqtyq óte az bolǵandyqtan, jeńimpaz áli anyqtamalaǵan.
Arizona shtatynda (sailaýshylar alqasynda 11 daýsy bar) Baiden 49,7 paiyz, al qazirgi prezident Donald Tramp 48,8 paiyz jinap tur. Baiden 30 myńdai adamnyń daýysymen alda keledi. Daýystardyń áli 1,3 paiyzy sanalyp bitpegen. Tórt jyl burynǵy sailaýda bul shtatta Tramp demokrat Hillari Klintondy 4 paiyz basymdyqpen jeńgen.
Djordjiia (sailaýshylar alqasynda 16 daýsy bar) shtatynda Baiden 49,4 paiyz, al Tramp 49,3 paiyz daýys alyp tur. Baiden 5 myńdai daýyspen alda. Biýlletenderdiń 1 paiyzy sanalyp bitpegen. Sońǵy on prezident sailaýynyń 9-ynda Djordjiia Respýblikalyq partiiany qoldaǵan. Ótken sailaýda Tramp 5 paiyz basymdyqpen jeńgen.
Nevada shtatynda Baiden 49,8, Tramp 48,0 paiyz daýys alyp tur. Baiden 22 myńdai daýys alda keledi. Daýystardyń áli 7,1 paiyzy sanalýy kerek. 2016 jylǵy sailaýda Hillari Klinton Donald Tramptan 2 paiyz artyq jinaǵan.
Pensilvaniia shtatynda (sailaýshylar alqasynyń 20 daýsy bar) Baiden 49,6, Tramp 49,2 paiyz daýys jinap tur. Baiden 29 myńdai daýys alda keledi. Biýlletenderdiń 3,8 paiyzy sanalyp bitken joq. Aldyńǵy sailaýda Tramp munda 0,7 paiyz daýyspen jeńgen.
3 qarashada ótken prezident sailaýynyń nátijesi taiaý arada shyǵyp qalýy múmkin. Kandidat AQSh prezidenti bolyp sailanýy úshin sailaýshylar alqasy daýysynyń keminde 270-in ielenýi kerek. Ár shtat turǵyndarynyń sanyna qarai sailaýshylar alqasynyń belgili bir daýsyn jeńip alady. Shtatta jai basymdyqpen jeńgen adam sol shtatqa tiesili daýystardy túgel alady. Tek Nebraska jáne Men shtattarynyń erejesi basqasha. Ázirge demokrat Djo Baiden 253, respýblikashyl Donald Tramp 214 daýys jinap tur.
