AQSh prezidenti Djo Baiden men vitse-prezident Kamala Harris násili aziialyq AQSh azamattaryna qarsy zorlyq-zombylyq pen alalaýdy aiyptady. Juma, 19 naýryz kúni ol ekeýi Djordjiia shtatyndaǵy Atlanta qalasyna saparlady. Ol jerde apta basynda 8 kisi óltirilgen. Onyń altaýy – násili aziialyq áiel.
16 naýryz kúni Atlanta qalasyndaǵy úsh massaj salonyna baryp, oq jaýdyrǵan. Kúdikti retinde 21 jastaǵy Robert Aaron Long deitin jergilikti turǵyn ustalǵan.
Politsiia ázirge kisi óltirýdiń násilshildikke qatysy bar degen qorytyndyǵa kele qoimady. Alaida "Amerika daýysy" radiosynyń habarlaýynsha, bul oqiǵa násili aziialyq AQSh azamattary arasynda dúrbeleń týdyrdy. Olardyń kóbi keiingi ýaqytta kúsheigen alalaý men jekkórýshilikke tap bolǵan.
Baiden men Harris aziialyq qaýymdastyq ókilderimen kezdesip, olardy jubatýǵa tyrysty.
"Amerikada násilshildik negizindegi jekkórýshilikke jol joq. Bárimiz oǵan núkte qoiýymyz kerek" dedi Baiden kezdesýden keiin.
Koronavirýs indeti paida bolǵaly násili aziialyq AQSh azamattaryna qarsy shabýyldar kúsheidi. Shabýyl jasaýshylar koronavirýstyń taraýyna Qytai men qytailyqtar jaýapty deidi. Násildik alalaýǵa ózge de aziialyq ulttardyń ókilderi de tap bolyp otyr.
"Sózdiń saldary bar" dep jazdy Baiden Twitter jelisinde. "Onyń aty – koronavirýs. Boldy".
Baiden bul sózimen aldyńǵy prezident Donald Trampty meńzedi. Ol koronavirýsty "Qytai virýsy" dep jii ataityn.
