Aq úi prezident sailaýynda jeńgen Djo Baidenge kún saiyn prezidentke tapsyrylatyn barlaý qyzmetiniń qupiia esebin tapsyrýdy maquldady. Mundai esepte ádette ulttyq qaýipsizdik jaily aqparat bolady. Esepke qol jetkizý - prezident ákimshiliginiń aýysý kezeńindegi eń mańyzdy qadamdardyń biri.
Bir kún buryn Tramp ákimshiligi bilikti ótkizý protsesin resmi túrde bastaýǵa kelisimin bergen.
24 qarashada Ýilmingtonde (Delaver shtaty) Baiden jýrnalisterge bergen suhbatynda eseptiń áli túspegenin aitty. Keiinirek NBC arnasyna "erteńnen qalmai túsedi" degen.
Osyǵan deiin Aq úi Baidenge barlaý qyzmetiniń esebin alýǵa ruqsat bermei kelgen bolatyn jáne onyń komandasy resmi tulǵalarmen bailanys ornatý múmkindiginen de aiyrylǵan edi. Tek 23 qarashada jalpy qyzmet ákimshiliginiń jetekshisi bilik tranzitin bastaýǵa bolady dep málimdegennen keiin jaǵdai ózgergen.
24 qarashada Baiden diplomatiia jáne qaýipsizdik salasyndaǵy negizgi kandidattardy tanystyrdy. Baiden Avril Heinsti – ulttyq barlaý qyzmetiniń direktory, Alehandro Maiorkasty - ishki qaýipsizdik ministri, Linda Tomas-Grinfildti – AQSh-tyń BUU-daǵy elshisi, Djeik Sallivandy ulttyq qaýipsizdik boiynsha keńesshi etýdi josparlap otyr.
Baiden komandasymen jumys isteýge ázir ekenin bildirip "Amerika qaita oraldy, álemnen syrt ainalmai, oǵan jetekshilik etýge daiyn" dedi.
