AQSh-tyń jańadan sailanǵan prezidenti Djo Baiden Aq úi jetekshisi Donald Tramp ákimshiliginiń qajetti dárejede áriptestik ornatpai otyrǵanyn málimdedi.
20 qańtarda prezident qyzmetine resmi túrde kirisetin Baiden bilik tranzitine qajet aqparatty jinaqtaý kezinde qorǵanys ministrligi men ákimshilik-biýdjet basqarmasy sheneýnikteriniń kedergisine tap bolǵanyn aitty.
"Dál qazir ókiletin jaqyn arada aiaqtaityn ákimshilikten qaýipsizdik boiynsha mańyzdy aqparatty ala almai otyrmyz. Muny - jaýapsyzdyq deýden basqasha ataý múmkin emes" dedi Djo Baiden.
28 jeltoqsanda Ýilmington qalasynda (Delaver shtatynda) sóilegen sózinde demokrat-saiasatker álemdegi Amerika áskeriniń jaǵdaiy men qorǵanys jáne ózge de vedomstvolardyń shyǵyny jaily aqparatpen tanysyp shyqqysy kelgenin aitqan.
Baiden málimdemesinen buryn vitse-prezident qyzmetine tańdalǵan Kamala Harris óz komandasymen jinalys ótkizgen edi. Jańa sailanǵan prezident komandasy Donald Tramp tusynda memleket úshin eń mańyzdy sala - qaýipsizdik qyzmetine "orasan zor shyǵyn keldi" degen qorytyndyǵa kelgen.
Al 3 qarasha kúngi sailaýdan keiin Tramp jarlyǵymen Pentagon jetekshisi etip taǵaiyndalǵan Kris Miller dúisenbi kúni málimdeme taratyp, vedomstvonyń Baiden komandasyna qajet qujattardyń barlyǵyn berip otyrǵanyn aitty.
Jeltoqsan aiynyń ortasynda sailaýshylar alqasy Djo Baidenniń prezident sailaýynda jeńiske jetkenin rastaǵan. Ol sailaýshylar alqasynyń 306 daýysyn alǵan, al Trampta 232 daýys bar.
Donald Tramp Baidenniń jeńisin moiyndaǵan joq. Ol sailaý nátijesi burmalandy dep esepteidi. Biraq sózine eshqandai aiǵaq keltirmedi. Sailaý nátijesi 6 qańtarda kongress palatalarynyń birlesken otyrysynda resmi rastalýy tiis.
