Parlament Májilisiniń jalpy otyrysynda «Qazaqstan Respýblikasynyń Úkimeti men Amerika Qurama Shtattarynyń Úkimeti arasyndaǵy halyqaralyq salyq tártibin jetildirý týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
Atalǵan kelisimge 2017 jylǵy 11 qyrkúiekte elordada qol qoiyldy.
«Qujatqa sáikes AQSh qarjy uiymdarymen halyqaralyq iskerlik operatsiialar júrgizetin barlyq sheteldik qarjy uiymdary AQSh salyq tóleýshileriniń shottary týraly aqparat berýge mindetti. Zań jobasy qarjy uiymdarynyń, onyń ishinde kredittik uiymdardyń, saqtandyrý, brokerlik jáne basqa da osyǵan uqsas kompaniialardyń qyzmetterin qamtidy. Osy rejimge qosylmaǵan jaǵdaida, eger tólemdi alýshy AQSh-ta salyq salynatyn tulǵa bolsa jáne aýdarylǵan qarajat AQSh-taǵy investitsiialarmen bailanysty tabys bolsa, halyqaralyq bank aýdarymdary somasynyń 30% - y ustalýy múmkin. Kelisimge qosylǵan qarjy institýttary Qazaqstanda shot ashqan barlyq amerikandyq jeke jáne zańdy tulǵalar týraly aqparatty anyqtaýǵa ári ashýǵa mindetti bolady», - dedi QR Ulttyq ekonomika ministri Álibek Qýantyrov.
Onyń aitýynsha, osyǵan uqsas, Qazaqstannyń Kelisimge qosylýy AQSh-ta shot ashqan barlyq qazaqstandyq jeke jáne zańdy tulǵalar týraly aqparat alýǵa múmkindik beredi. Iaǵni, atalǵan másele boiynsha elder arasyndaǵy ózara is-qimyl Qazaqstannyń biýdjetine de oń áserin tigizedi.
Kelisimge sáikes, Qazaqstan ortalyqtandyrylǵan aqparat jinaýdy kózdeitin modeldi neǵurlym ońtaily qadam retinde tańdady, óitkeni osy modeldi iske asyrý:
- qarjy júiesin baqylaýdy saqtaýǵa;
- AQSh-tan Qazaqstannyń rezidentteri jáne azamattary týraly tiisti aqparat alýǵa;
- Qazaqstan qarjy institýttarynyń ákimshilik shyǵyndaryn qysqartýǵa;
- Kelisimniń talaptarymen bailanysty qarjy sektory úshin táýekelderdi tómendetýge múmkindik beredi.
«Qazaqstan Respýblikasynyń halyqaralyq sharttary týraly» Qazaqstan Respýblikasynyń Zańyna sáikes Kelisim ratifikatsiialaýǵa jatady.
