AQSh soty LinkedIn, DropBox servisi men birqatar internet kompaniia qosymshalary qoldanýshylarynyń derekterin urlady dep aiyptalǵan Resei azamaty Evgenii Nikýlindi jeti jyl tórt aiǵa bas bostandyǵynan aiyrdy.
Federaldyq sot úkimi 29 qyrkúiekte San-Frantsisko qalasynda oqyldy.
"Meniń oiymsha, siz keremet aqyldy jigitsiz. Kompiýterlerdi buzǵansha talantyńyzdy zańdy kásipke jumsap, ómirde jaqsy bir nárse qaldyrýǵa shaqyramyn" dedi sýdia Ýiliam Alsýp Nikýlinge.
Sýdianyń sózine qaraǵanda sot úkimin kútip, tórt jyl qamaýda bolǵan Nikýlinge berilgen jazada sol kezeń de eskerilgen. Sýdia sonymen birge sottalýshynyń Reseide kámeletke tolmaǵan kishkentai balasy jáne qartaiǵan anasy qalǵanyn da eskergen. Nikýlin advokaty Valerii Nechaidyń aitýynsha, sońǵy birneshe jylda sottalýshynyń anasy birneshe operatsiiany, úsh insýltti bastan keshirgen.
Shilde aiynda sot alqasy Nikýlinniń 2012 jyly LinkedIn, Formspring jáne Dropbox servisin paidalanatyn 112 million qoldanýshynyń deregin urlaǵany dáleldendi dep qorytyndy jasaǵan. Onyń protsesi shamamen 4 jylǵa sozyldy.
Nikýlin Interpol ótinishi boiynsha 2016 jyly qazan aiynda Pragada ustalǵan. Ony Resei de qaitarýdy suraǵan. Ol Chehiiadan saiasi baspana suraǵan. 2018 jyly sáýir aiynda AQSh-qa ekstraditsiialanǵan. Keiinirek Chehiianyń konstitýtsiialyq soty ekstraditsiialaý jaily sheshimdi zańsyz dep tapqan.
