Kóptegen elder AstraZeneca vaktsinasyn qoldanýdy ýaqytsha toqtatatynyn málimdedi. Bul rette, Eýropalyq retteýshi preparattyń tiimdiligine senim bildirip otyr. Al Frantsiiada ǵalymdar qarapaiym PTR-testiler anyqtai almaityn koronavirýstyń jańa shtammyn tirkedi. AQSh-ta koronavirýsqa vaktsina alǵan anadan antideneleri bar shaqalaq dúniege keldi. Bul týraly VVS saity habarlady.
EO retteýshisi AstraZeneca vaktsinasyna senimin bildirip otyr
Seisenbi kúni Dárilik quraldardyń eýropalyq agenttigi (EMA) ózinde bar málimetterge sáikes AstraZeneca vaktsinasy men vaktsina egilgen keibir adamdarda trombtardyń paida bolýy arasynda esh bailanys joqtyǵyn taǵy bir málimdedi.
EMA basshysy Emer Kýk bul vaktsinanyń paidasy barlyq qaýipterdiń ornyn basatynyna tolyq senimdi ekenin basa aitty.
AstraZeneca málimetinshe, Eýropada vaktsina egilgen 17 million adamnyń arasynda trombozdyń 37 oqiǵasy tirkelgen. EMA bul oqiǵalardyń árqaisysyna taldaý júrgizýde.
«Tromboz EO-daǵy myńdaǵan adamda bolatynyń bilemiz jáne ekpe salǵandar mundai jaǵdaiǵa ne sebepten tap bolǵanyn naqty anyqtaǵymyz keledi. Tekserý jalǵasýda. Biraq qazirgi kezde AstraZeneca vaktsinasynyń paidasy Covid-19 virýsy men onymen bailanysty aýrý jáne ólim oqiǵalary qaýpinen joǵary bolyp otyrǵanyn senimmen aita alamyz», - dep baiandady Emer Kýk.
EM-nyń tergeý qorytyndylary beisenbi kúni belgili bolady.
Búginde Germaniia, Italiia, Frantsiia, Ispaniia, Portýgaliia, Sloveniia, Islandiia, Irlandiia, Norvegiia, Daniia, Niderlandy, Indoneziia jáne Venesýelada AstraZeneca preparatymen egýdi ýaqytsha toqtatty. Seisenbide bul elder tizimine Latviia men Shvetsiia qosyldy.
Al Germaniiada óńirlik jáne federaldyq kóshbasshylar EMA tergeýiniń qorytyndysy shyqqansha atalmysh preparatpen vaktsinalaý baǵdarlamasyn keńeitýdi keiinge qaldyrdy.
Tailand biligi bolsa, kerisinshe, AstraZeneca vaktsinasyn ýaqytsha qoldanbaý sheshimin ózgertti. Seisenbi kúni bul vaktsinany eldiń premer-ministri Praiýt Chan-Ocha saldyrtty. «Kúmándanyp júrgen adamdar bar. Biraq biz dárigerlerge, meditsinanyń naǵyz mamandaryna senýimiz kerek», - dedi Tailand eliniń úkimet basshysy.
AstraZeneca vaktsinasyn ári qarai qoldaný sheshimi týraly Avstraliia biligi de málim etti. Al Kanadanyń premer-ministri Djastin Triýdo otandastaryn Eýropadaǵy reaktsiiaǵa qaramastan ekpe saldyrtýdan bas tartpaýǵa shaqyrdy.
Juma kúni AstraZeneca men trombtardyń arasynda bailanys dálelderiniń joq ekenin Dúniejúzilik densaýlyq saqtaý uiymy da málimdep, úkimetterdi ony pandemiiaǵa qarsy kúres quraly retinde qoldanýyn toqtatpaýǵa úndedi.
Aita keteiik, Britaniiada bul vaktsina - negizgilerdiń biri, AstraZeneca-nyń birinshi dozasyn milliondaǵan adam alyp úlgerdi.
Frantsiia kádimgi testiler anyqtai bermeitin koronavirýstyń jańa shtamyn tirkedi
Frantsiia biligi eldiń batysyndaǵy Bretan óńirinde ǵalymdar koronavirýstyń jańa shtamyn anyqtaǵanyn málimdedi. Bastapqy baǵalaý boiynsha, bul shtamm basqalaryna qaraǵanda áldeqaida juqpaly nemese qaýipti emes, delingen densaýlyq saqtaý ministrliginiń málimdemesinde. Biraq onyń basqa qaýipti ereksheligi bolýy múmkin.
Bul shtamdy juqtyryp alǵan adamdar toby Lanon qalasynyń aýrýhanasynda anyqtaldy. Biraq olardyń keibirinde indet belgileri bar bolǵanymen, koronavirýsty anyqtaý úshin ádette jasalatyn tiimdi PTR-test teris bolyp shyqqan.
AQSh-ta Covid-19 virýsyna qarsy antideneleri bar sábi dúniege keldi
Florida shtatyndaǵy Boka-Ratonnyń pediatr dárigerleri Pol Gilbert pen Ched Rýdnik qanynda Covid-19 virýsynan qorǵaityn antideneleri bar sábidiń dúniege kelgenin jáne bul alǵashqy oqiǵa bolyp tabylatynyn aitty.
Doktor Gilberttiń aitýynsha, qańtarda densakýlyq saqtaý júiesiniń júkti qyzmetkeri balasyn bosanýǵa úsh apta ýaqyt qalǵanda Moderna vaktsinasynyń ekpesin saldyrtty. Dárigerler bolsa, antidenelerdiń anasynan balasyna ótý-ótpeýin anyqtaý maqsatynda, bul jaǵdaidy nazarǵa alǵan.
Sábi dúniege kelgen kezde olar birden kindiginen qan taldaýyn alyp, antidenelerdi anyqtady. Antideneler nárestege tek anasynan ótýi múmkin ekendigi málimdeldi. Sebebi áiel koronavirýspen aýyrmaǵan, tek indetke qarsy vaktsina saldyrǵan.
