Ǵylymi-bilim berý ortalyǵy ál-Farabi atyndaǵy Qazaq ulttyq ýniversiteti men Amerikanyń Órkenietter yntymaqtastyǵy jáne almasý qory (ÓYAQ) arasyndaǵy ózara kelisim boiynsha Merilend qalasynda (AQSh) ashylady.
Bul órkenietterdiń uly filosofy – ál-Farabidiń 1150-jyldyq mereitoiy atap ótilip jatqan aitýly jyly AQSh pen Qazaqstan arasyndaǵy yntymaqtastyqty damytýda mańyzdy oqiǵa bolmaq.
Ortalyq Qazaq ulttyq ýniversiteti esimin abyroimen alyp júrgen adamzattyń kórnekti oishyly Ábý Nasyr ál-Farabidiń altyn entsiklopediialyq murasyn ilgeriletý salasyndaǵy birlesken jobalardy iske asyrý jónindegi biregei halyqaralyq alańǵa ainalady.
Órkenietter yntymaqtastyǵy jáne almasý qorynyń basty missiiasy túrli konfessiiaǵa jatatyn halyqtar men mádenietterdiń yntymaqtastyǵyn damytý.
Qor basshysy Mohamad Bashar Arafat atap ótkendei: «Osy turǵydan alǵanda, ásirese pandemiia jáne álemdik ekonomika men saiasattaǵy tereń ózgerister jaǵdaiynda qazirgi álemde ál-Farabidiń rýhani murasyna júginýdiń mańyzy asa zor.
Ál-Farabidiń ilimi qaiyrymdy jáne kemeldi qoǵamǵa qol jetkizý jolynda birigý ári yntymaqtastyq ideialaryn negizge alǵan, sondai-aq, bul ideialar búgingi kúni jańa qaýip-qaterlerge tap bolǵan álem úshin erekshe ózekti».
Jýyrda Qazaqstannyń AQSh-taǵy Elshiliginiń qoldaýymen QazUÝ Djordj Vashington atyndaǵy Amerika ýniversitetimen birlesip uly oishyldyń mereitoiyna arnalǵan onlain dóńgelek ústel ótkizdi.
Ýniversitet álemniń túrli elderinde ál-Farabidiń 12 ortalyǵy men úiin ashyp, belsendi jumys júrgizýde. Osyndai Ortalyq Amerikada alǵash ret ashylady.
AQSh-ta «ál-Farabidiń» alǵashqy ortalyǵyn ashý týraly ýaǵdalastyq adamzat oishylynyń tulǵasyna degen joǵary qurmettiń jáne onyń gýmanistik murasyna erekshe qyzyǵýshylyqtyq belgisi retinde baǵalanady.
Ál-Farabi atyndaǵy QazUÝ-dyń belsendi halyqaralyq qyzmeti jáne onyń amerikalyq áriptesterimen tiimdi ózara árekettesýi, Merilendtegi «ál-Farabi» ortalyǵyna uly filosoftyń murasyn elimizdiń brendi retinde zerdeleý men ilgeriletýdiń, sondai-aq jerdiń batys jarty sharynda Qazaqstannyń tili men mádenietin dáripteýdiń ozyq ortalyǵy bolýǵa múmkindik beredi.
