AQSh-ta sot Minneapolis politsiiasynyń burynǵy qyzmetkerin Djorj Floidtyń ólimine kináli dep tapty. On saǵatqa sozylǵan jaryssózden keiin 12 adamnan quralǵan sot alqasy 20 sáýirde Shovindi barlyq úsh aiyp boiynsha kináli dep tapty. Oǵan úsh bap: "abaisyzda kisi óltirý", "adam óltirý" jáne "tunshyqtyrý" baptary boiynsha aiyp taǵylǵan bolatyn. 45 jastaǵy Shovinge ondaǵan jyl túrme jazasy berilýi múmkin. Zańger sarapshylar onyń apelliatsiiaǵa júginý quqy bar ekenin aitady.
Byltyr mamyr aiynda dúkende jalǵan kýpiýra ótkizgeni úshin politsiia nazaryna iligip, ustaý kezinde qaza bolǵan Djordj Floidtyń ólimi AQSh-ta iri narazylyq týǵyzyp, násilshildik máselesiniń qaita qozǵalýyna túrtki boldy. Politsiia qyzmetkeri Derek Shovinniń ony toǵyz minýttan astam ýaqyt tizesimen tunshyqtyryp, ustap turǵany jaily video álemge tarady.
Prezident Djo Baiden sot úkimin jyly qarsy alyp, "el-kún amanda jasalǵan qylmys" AQSh-tyń quqyq qorǵaý salasyndaǵy máselelerdi jáne násilmen bailanysty problemalar baryn kórsetti dep málimdedi.
Minneapolistegi sot zalynda Shovinniń qolyna kisen salynyp, qamaýǵa áketilgen kezde ǵimarat syrtyna jinalǵan kóp adam úkimdi qol shapalaqtap qarsy aldy. Sot otyrysy shamamen úsh aptaǵa sozylyp, ondaǵan kýáger tartyldy.
