AQSh Shyńjańdaǵy uiǵyr jáne qazaq sekildi baiyrǵy etnikalyq toptardyń "quqyǵyn óreskel buzýǵa" qatysy bar degen aiyppen Qytaidyń úkimettik qurylymyna jáne eki sheneýnigine sanktsiia saldy.
Sanktsiia Shyńjań óndiris jáne qurylys korpýsyna (HRSS) salyndy. AQSh qarjy ministrligi bul kásiporyndy "Qytai kommýnistik partiiasyna baǵynatyn... áskerilengen mekeme" dep atap, ony "ólkedegi ishki baqylaýdy kúsheitip, ekonomikalyq damýdyń qytailyq nusqasy engizýge úles qosqan" dep aiyptady.
AQSh-tyń sanktsiiasyna sondai-aq partiia qairatkeri ári XPCC jetekshisi Pen Tsziajýi men XPCC-diń burynǵy saiasi komissary Sýn Tszinlýn de ilindi.
Sanktsiia ilingenderdiń Amerikadaǵy múlki buǵattalady, al amerikalyqtarǵa olarmen biznes júrgizýge tyiym salynady.
Osy kúnderi AQSh pen Qytai bir-birine qyrǵi-qabaq shyrai tanytyp keledi. AQSh Qytaidy Shyńjańdaǵy dini islam etnikalyq toptardyń quqyqtaryn óreskel buzdy dep aiyptap, qysym kórsetý sharalaryn qabyldai bastady.
Qytai biligi Shyńjańdaǵy millionnan asa uiǵyr men qazaq sekildi dini islam etnikalyq toptardyń ókilderin "saiasi qaita tárbieleý lagerlerine" qamap, azaptap, tili men dástúrinen bas tartýǵa májbúrlep jatyr dep aiyptalyp otyr. Qytai munyń bárin joqqa shyǵaryp, aiypty ishki isine aralasý dep baǵalady.
