اقش شىڭجاڭداعى ۇيعىر جەنە قازاق سەكٸلدٸ بايىرعى ەتنيكالىق توپتاردىڭ "قۇقىعىن ٶرەسكەل بۇزۋعا" قاتىسى بار دەگەن ايىپپەن قىتايدىڭ ٷكٸمەتتٸك قۇرىلىمىنا جەنە ەكٸ شەنەۋنٸگٸنە سانكتسييا سالدى.
سانكتسييا شىڭجاڭ ٶندٸرٸس جەنە قۇرىلىس كورپۋسىنا (حرسس) سالىندى. اقش قارجى مينيسترلٸگٸ بۇل كەسٸپورىندى "قىتاي كوممۋنيستٸك پارتيياسىنا باعىناتىن... ەسكەريلەنگەن مەكەمە" دەپ اتاپ, ونى "ٶلكەدەگٸ ٸشكٸ باقىلاۋدى كٷشەيتٸپ, ەكونوميكالىق دامۋدىڭ قىتايلىق نۇسقاسى ەنگٸزۋگە ٷلەس قوسقان" دەپ ايىپتادى.
اقش-تىڭ سانكتسيياسىنا سونداي-اق پارتييا قايراتكەرٸ ەرٸ XPCC جەتەكشٸسٸ پەن تسزياجۋي مەن XPCC-دٸڭ بۇرىنعى ساياسي كوميسسارى سۋن تسزينلۋن دە ٸلٸندٸ.
سانكتسييا ٸلٸنگەندەردٸڭ امەريكاداعى مٷلكٸ بۇعاتتالادى, ال امەريكالىقتارعا ولارمەن بيزنەس جٷرگٸزۋگە تىيىم سالىنادى.
وسى كٷندەرٸ اقش پەن قىتاي بٸر-بٸرٸنە قىرعي-قاباق شىراي تانىتىپ كەلەدٸ. اقش قىتايدى شىڭجاڭداعى دٸنٸ يسلام ەتنيكالىق توپتاردىڭ قۇقىقتارىن ٶرەسكەل بۇزدى دەپ ايىپتاپ, قىسىم كٶرسەتۋ شارالارىن قابىلداي باستادى.
قىتاي بيلٸگٸ شىڭجاڭداعى ميلليوننان اسا ۇيعىر مەن قازاق سەكٸلدٸ دٸنٸ يسلام ەتنيكالىق توپتاردىڭ ٶكٸلدەرٸن "ساياسي قايتا تەربيەلەۋ لاگەرلەرٸنە" قاماپ, ازاپتاپ, تٸلٸ مەن دەستٷرٸنەن باس تارتۋعا مەجبٷرلەپ جاتىر دەپ ايىپتالىپ وتىر. قىتاي مۇنىڭ بەرٸن جوققا شىعارىپ, ايىپتى ٸشكٸ ٸسٸنە ارالاسۋ دەپ باعالادى.
