13 aqpan kúni AQSh-tyń burynǵy prezidenti Donald Trampqa impichment jariialaý máselesin tergegen AQSh senaty daýys berdi. 57 senator Trampty búlikke arandatý aiyby boiynsha aiypty dep tapsa, 43 senator eks-prezidenttiń kinási joq dedi.
Donald Trampqa taǵylǵan aiyp 6 qańtar kúngi Kapitoliidegi oqiǵaǵa bailanysty bolǵan. Sol kúni AQSh Kongresiniń qos palatasy ortaq jiyn ótkizip, byltyrǵy qarashada ótken prezident sailaýynyń nátijesin bekitýi kerek bolǵan. Jiyn bastalǵanda prezidenttik merzimi aiaqtaýǵa taiaǵan Tramptyń jaqtastary Kapitoliige basyp kirip, politsiiamen qaqtyǵysyp qaldy. Saldarynan 5 adam qaitys boldy, onyń biri – politsiia qyzmetkeri. Jaqtastary Kapitoliige Tramptyń Aq úi janyndaǵy mitingisinen kelgen. Mitingide ol sailaý nátijesin moiyndamaitynyn, "aiaǵyna deiin" kúresýge shaqyrǵan.
AQSh-ta impichment jariialaý tártibi boiynsha, is aldymen Kongrestiń Ókilder palatasynda qaralady. Eger bul palata kópshilik daýyspen prezidentke impichmen jariialasa, is joǵarǵy palata sanalatyn senatqa ótedi.
Senat prezidentti taǵylǵan aiyp boiynsha kináli dep tanýy depýtattardyń kemi úshten ekisiniń daýysy (67 daýys) kerek. Qazir senatta 48 demokrat pen ylǵi demokrattardy qoldaityn eki táýelsiz ókil bar. Trampty aiypty dep tabý úshin kemi 17 respýblikashyl senatordyń daýysy kerek bolǵan. Biraq demokrattar taqqan aiypty bar bolǵany 7 respýblikashyl senator qoldady.
Respýblikashyldardyń senattaǵy lideri Mitch Makkonnell Trampty aqtap daýys bergenimen, eks-prezidentti aiyptai sóiledi.
"Prezident Tramptyń sol kúngi oqiǵany arandatýǵa is-júzinde de, moraldyq turǵydan da jaýapty ekeni daýsyz. Ǵimaratqa basyp kirgender prezidentiniń qalaýy men nusqaýy boiynsha áreket etkenine sendi" dedi ol.
Makkonnell aqtap daýys berýine túsinikteme berdi. Ol AQSh konstitýtsiiasynyń senatqa burynǵy prezidenttke impichment jariialaityn quzyret bermegenin aitty.
