13 اقپان كٷنٸ اقش-تىڭ بۇرىنعى پرەزيدەنتٸ دونالد ترامپقا يمپيچمەنت جارييالاۋ مەسەلەسٸن تەرگەگەن اقش سەناتى داۋىس بەردٸ. 57 سەناتور ترامپتى بٷلٸككە ارانداتۋ ايىبى بويىنشا ايىپتى دەپ تاپسا, 43 سەناتور ەكس-پرەزيدەنتتٸڭ كٸنەسٸ جوق دەدٸ.
دونالد ترامپقا تاعىلعان ايىپ 6 قاڭتار كٷنگٸ كاپيتولييدەگٸ وقيعاعا بايلانىستى بولعان. سول كٷنٸ اقش كونگرەسٸنٸڭ قوس پالاتاسى ورتاق جيىن ٶتكٸزٸپ, بىلتىرعى قاراشادا ٶتكەن پرەزيدەنت سايلاۋىنىڭ نەتيجەسٸن بەكٸتۋٸ كەرەك بولعان. جيىن باستالعاندا پرەزيدەنتتٸك مەرزٸمٸ اياقتاۋعا تاياعان ترامپتىڭ جاقتاستارى كاپيتولييگە باسىپ كٸرٸپ, پوليتسييامەن قاقتىعىسىپ قالدى. سالدارىنان 5 ادام قايتىس بولدى, ونىڭ بٸرٸ – پوليتسييا قىزمەتكەرٸ. جاقتاستارى كاپيتولييگە ترامپتىڭ اق ٷي جانىنداعى ميتينگٸسٸنەن كەلگەن. ميتينگٸدە ول سايلاۋ نەتيجەسٸن مويىندامايتىنىن, "اياعىنا دەيٸن" كٷرەسۋگە شاقىرعان.
اقش-تا يمپيچمەنت جارييالاۋ تەرتٸبٸ بويىنشا, ٸس الدىمەن كونگرەستٸڭ ٶكٸلدەر پالاتاسىندا قارالادى. ەگەر بۇل پالاتا كٶپشٸلٸك داۋىسپەن پرەزيدەنتكە يمپيچمەن جارييالاسا, ٸس جوعارعى پالاتا سانالاتىن سەناتقا ٶتەدٸ.
سەنات پرەزيدەنتتٸ تاعىلعان ايىپ بويىنشا كٸنەلٸ دەپ تانۋى دەپۋتاتتاردىڭ كەمٸ ٷشتەن ەكٸسٸنٸڭ داۋىسى (67 داۋىس) كەرەك. قازٸر سەناتتا 48 دەموكرات پەن ىلعي دەموكراتتاردى قولدايتىن ەكٸ تەۋەلسٸز ٶكٸل بار. ترامپتى ايىپتى دەپ تابۋ ٷشٸن كەمٸ 17 رەسپۋبليكاشىل سەناتوردىڭ داۋىسى كەرەك بولعان. بٸراق دەموكراتتار تاققان ايىپتى بار بولعانى 7 رەسپۋبليكاشىل سەناتور قولدادى.
رەسپۋبليكاشىلداردىڭ سەناتتاعى ليدەرٸ ميتچ ماككوننەلل ترامپتى اقتاپ داۋىس بەرگەنٸمەن, ەكس-پرەزيدەنتتٸ ايىپتاي سٶيلەدٸ.
"پرەزيدەنت ترامپتىڭ سول كٷنگٸ وقيعانى ارانداتۋعا ٸس-جٷزٸندە دە, مورالدىق تۇرعىدان دا جاۋاپتى ەكەنٸ داۋسىز. عيماراتقا باسىپ كٸرگەندەر پرەزيدەنتٸنٸڭ قالاۋى مەن نۇسقاۋى بويىنشا ەرەكەت ەتكەنٸنە سەندٸ" دەدٸ ول.
ماككوننەلل اقتاپ داۋىس بەرۋٸنە تٷسٸنٸكتەمە بەردٸ. ول اقش كونستيتۋتسيياسىنىڭ سەناتقا بۇرىنعى پرەزيدەنتتكە يمپيچمەنت جارييالايتىن قۇزىرەت بەرمەگەنٸن ايتتى.
