AQSh senaty koronavirýs indetinen zardap shekken azamattary men ekonomikasyna kómek kórsetý týraly zań jobasyn qabyldady. Endi júzdegen million amerikalyq 1400 dollar kólemindegi bir rettik járdemaqy ala bastaidy. Eldiń jańa sailanǵan prezidenti Djo Baiden usynǵan kómek josparynyń jalpy quny – 1,9 trillion dollar. Bul qarjynyń bir bóligi vaktsina óndirýshiler men distribiýterlerge qoldaý retinde jumsalmaq.
Zań jobasy qabyldanǵan soń Djo Baiden Aq úide sóz sóilep, amerikalyq otbasylardyń 85 paiyzy bir rettik járdemaqy alady dep aitty. Al eki bala tárbielep otyrǵan, jylyna 100 myń dollar tabatyn erli-zaiyptyǵa 5600 dollar berilmek.
"Amerikany qutqarý jospary" dep atalyp júrgen zań jobasyn 100 senatordyń 50-i qoldady, 49-y qarsy daýys berdi. Daýys berýge qatysqan birde-bir respýblikashyl senator Baiden josparyn qoldamady. Aliaska shtatynyń ókili Deniel Sallivan juma, 5 naýryz kúni jerleý rásimine bailanysty Vashingtonnan ketýge májbúr bolyp, demokrattar vitse-prezident Kamala Harristiń daýysyna muqtaj bolmady deidi "Amerika daýysy".
AQSh parlamentiniń joǵarǵy palatasynda 50 respýblikashyl senator bar. Daýys berý kezinde tepe-teńdik ornasa, vitse-prezidentke daýys berý quqyǵy beriledi.
Osylaisha AQSh úkimetiniń keiingi jylda ekonomikany yntalandyrýǵa bólgen qarajaty 6 trillion dollarǵa jýyqtady.
