اقش سەناتى كوروناۆيرۋس ٸندەتٸنەن زارداپ شەككەن ازاماتتارى مەن ەكونوميكاسىنا كٶمەك كٶرسەتۋ تۋرالى زاڭ جوباسىن قابىلدادى. ەندٸ جٷزدەگەن ميلليون امەريكالىق 1400 دوللار كٶلەمٸندەگٸ بٸر رەتتٸك جەردەماقى الا باستايدى. ەلدٸڭ جاڭا سايلانعان پرەزيدەنتٸ دجو بايدەن ۇسىنعان كٶمەك جوسپارىنىڭ جالپى قۇنى – 1,9 تريلليون دوللار. بۇل قارجىنىڭ بٸر بٶلٸگٸ ۆاكتسينا ٶندٸرۋشٸلەر مەن ديستريبيۋتەرلەرگە قولداۋ رەتٸندە جۇمسالماق.
زاڭ جوباسى قابىلدانعان سوڭ دجو بايدەن اق ٷيدە سٶز سٶيلەپ, امەريكالىق وتباسىلاردىڭ 85 پايىزى بٸر رەتتٸك جەردەماقى الادى دەپ ايتتى. ال ەكٸ بالا تەربيەلەپ وتىرعان, جىلىنا 100 مىڭ دوللار تاباتىن ەرلٸ-زايىپتىعا 5600 دوللار بەرٸلمەك.
"امەريكانى قۇتقارۋ جوسپارى" دەپ اتالىپ جٷرگەن زاڭ جوباسىن 100 سەناتوردىڭ 50-ٸ قولدادى, 49-ى قارسى داۋىس بەردٸ. داۋىس بەرۋگە قاتىسقان بٸردە-بٸر رەسپۋبليكاشىل سەناتور بايدەن جوسپارىن قولدامادى. الياسكا شتاتىنىڭ ٶكٸلٸ دەنيەل سالليۆان جۇما, 5 ناۋرىز كٷنٸ جەرلەۋ رەسٸمٸنە بايلانىستى ۆاشينگتوننان كەتۋگە مەجبٷر بولىپ, دەموكراتتار ۆيتسە-پرەزيدەنت كامالا حارريستٸڭ داۋىسىنا مۇقتاج بولمادى دەيدٸ "امەريكا داۋىسى".
اقش پارلامەنتٸنٸڭ جوعارعى پالاتاسىندا 50 رەسپۋبليكاشىل سەناتور بار. داۋىس بەرۋ كەزٸندە تەپە-تەڭدٸك ورناسا, ۆيتسە-پرەزيدەنتكە داۋىس بەرۋ قۇقىعى بەرٸلەدٸ.
وسىلايشا اقش ٷكٸمەتٸنٸڭ كەيٸنگٸ جىلدا ەكونوميكانى ىنتالاندىرۋعا بٶلگەن قاراجاتى 6 تريلليون دوللارعا جۋىقتادى.
