AQSh senaty burynǵy prezident Donald Trampqa impichment jariialaý boiynsha tergeýdi 8 aqpannan bastalatyn aptada qaita qolǵa almaq. Kongresmender Trampty 6 qańtarda Vashingtondaǵy Kapitolii ǵimaratyna ashýly jurtty aidap salyp, "búlikke shaqyrdy" dep aiyptaidy.
Senattaǵy demokrattar basshysy Chak Shýmer Respýblikalyq partiiadan sailanǵan senatorlarmen aqyldasqan soń osy kesteni jariialady.
AQSh kongresiniń tómengi palatasynyń spikeri Nensi Pelosi Donald Trampqa impichment jariialaý týraly qarar jobasyn 25 qańtarda joǵarǵy palata – senatqa joldamaq. Sol kúnniń ertesinde bastapqy impichment protsedýrasy bastalýy tiis.
"Tyńdaý AQSh senatynda júredi, prezidentti aiyptaý máselesi daýys berý arqyly sheshiledi" dedi senatta sóz sóilegen Shýmer.
Tramp – AQSh tarihynda eki ret impichment jariialanǵan jáne bilikten ketken soń da impichment daýy jalǵasyp jatqan alǵashqy prezident. Donald Tramp biliktegi merzimi aiaqtalǵan 20 qańtarda kelesi prezident Djo Baidenniń inaýgýratsiia rásimine qatysýdan bas tartyp, Floridaǵa ketip qalǵan.
6 qańtarda Tramptyń jaqtastary AQSh kongresi ornalasqan Kapitolii ǵimaratyna basyp kirip, sonyń kesirinen bes kisi qaza tapqan. Qaza tapqandardyń biri – politsiia qyzmetkeri.
Donald Tramp byltyr 3 qarashada ótken prezident sailaýynda Djo Baidennen jeńilgen. Alaida ol "daýystar urlandy" dep kóp márte negizsiz málimdeme jasap, jaqtastaryn "ádildik úshin kúreske" shaqyryp kelgen.
AQSh Kongresiniń ókilder palatasy Donald Trampqa impichment jariialaý týraly qarardy ótken aptada qabyldaǵan. "Prezident halyqty búlikke shaqyrdy" dep aiyptaǵan qujatty palatanyń 232 múshesi qoldasa, 197 kongressmen qarsy daýys bergen.
Ókilder palatasyndaǵy demokrattar Baidenniń prezidenttik merzimi bastalǵan soń senattaǵy protsesti tezdetýdi qalaitynyn aitty. Al respýblikalyqtar eks-prezidenttiń daiyndalýyna ýaqyt berý úshin isti aqpannyń sońyna jyljytý kerek dep sanaǵan.
Onyń ústine olar aldymen Baiden kabinetine usynylǵan kandidattardy bekitip, koronavirýs pandemiiasy kezinde ekonomikalyq kómek usynatyn basqa da mańyzdy zań jobalaryna basymdyq berý kerek degen.
Trampqa resmi túrde aiyp taǵý úshin Respýblikalyq partiiadan sailanǵan keminde 17 senator impichmentti qoldaýy kerek. Sarapshylar bul múmkin emes dep sanaidy.
Sol kúni respýblikashyl senatorlardyń kóbi Tramptyń áreketin synǵa alǵanymen, oǵan resmi aiyp taqqysy keletin adam óte az. Sebebi Respýblikalyq partiia músheleriniń arasynda Donald Tramptyń reitingi áli de joǵary. Sonymen birge olar bul tergeý eldi ekige jarady dep sanaidy ári bilikten ketken prezidentke impichment jariialaýdyń qisyny joqtyǵyn aitady.
Tramp keńesshisiniń málimeti boiynsha, eks-prezident impichmentke qatysty tyńdaýda óz atynan ókildik etýi úshin Djordj Býsh ákimshiliginde qyzmet etken Batch Baýers esimdi zańgerdi jaldaǵan.
