AQSh Saýd Arabiiasynyń jýrnalisi Jamal Hashoggidiń ólimine bailanysty Er-Riiadqa sanktsiia saldy. "Magnitskii zańy" aiasynda salynǵan qarjylyq shekteýge Saýd Arabiianyń 17 azamaty ilindi.
"Qara tizimge" engender arasynda Saýd Arabiiasynyń Stambýldaǵy bas konsýly, barlaý qyzmetiniń polkovnigi jáne taq murageri Muhammed ibn Salmannyń keńesshisi bar. AQSh Qarjy ministrligi atalǵan adamdar jýrnalisti óltirý operatsiiasyna qatysqan dep atady.
Washington Post basylymynyń sholýshysy, sońǵy jyldary Er-Riiadtyń saiasatyn synap júrgen oppozitsiialyq jýrnalist Jamal Hashoggi 2 qazan kúni Saýd Arabiiasynyń Stambýldaǵy konsýldyǵyna qujattaryn rásimdeýge kirip, qaityp shyqpaǵan.
Er-Riiad áýelde Jamal Hashoggidiń joǵalýyna qatysy joǵyn aitqanymen, eki aptadan soń jýrnalistiń arnaiy qyzmettiń "ruqsat berilmegen operatsiiasy barysynda" qaza tapqanyn málimdegen edi. Keiin Saýd Arabiiasynyń prokýrory jýrnalistiń qasaqana óltirilgenin moiyndaǵan. Biraq Hashoggidiń denesi sol kúii tabylmady.
Saýd Arabiiasy biligi bul iske qatysy bar dep 18 adamdy tutqyndady jáne Hashoggidiń týystaryna kóńil aitty. Taq murageriniń joǵary shendi bes keńesshisi qyzmetterinen bosatyldy.
15 qarashada Saýd Arabiiasynyń prokýrory Jamal Hashoggidi óltirý týraly buiryqty Stambýlǵa attanǵan kelissóz tobynyń basshysy bergenin málimdedi. Olar Hashoggidi Saýd Arabiiasyna ákelmek bolǵan. Prokýror 11 adamǵa aiyp taǵylǵanyn jetkizdi. Biraq Er-Riiad bul iske el biliginiń qatysy joq dep otyr.
Batys elderi men Túrkiia biligi munymen kelispeidi. Olar jýrnalisti óltirýge taq murageri hanzada Salmannyń qatysy bolýy múmkin dep esepteidi.
