AQSh Reseige salynǵan sanktsiialardyń Qazaqstanǵa áserin barynsha jumsartýǵa tyrysady. Bul týraly AQSh Memlekettik hatshysy Ýzra Zeiamen kezdesýden keiingi brifingide QR Syrtqy ister ministriniń birinshi orynbasary Aqan Rahmetýllin aitty, dep habarlaidy QazAqparat.
«Másele shynymen de óte kúrdeli, ári mańyzdy. Qazir ǵana AQSh Memlekettik hatshysynyń orynbasary atap ótkendei, AQSh Reseige, birqatar tulǵaǵa teńdessiz sanktsiia salyp otyr. Elderimizdiń arasynda tereń integratsiianyń, álemdegi eń uzyn shekaranyń bolýyna bailanysty bul sanktsiialardyń áserinen tysqary qalmaityndyǵymyz sózsiz. Muny qazirdiń ózinde baǵa qalyptasý saiasatynan, dúkenderdegi ahýaldan baiqap júrsizder», - dedi ministrdiń birinshi orynbasary BAQ ókilderiniń saýalyna orai.
Ol Qazaqstan Úkimeti AQSh ókilderimen barlyq deńgeide qarqyndy kelissóz júrgizip jatqanyn atap ótti.
«Osy oraida AQSh-qa osynaý ikemdiligi, yntymaqtastyqqa daiyndyǵy úshin rizashylyǵymdy bildirgim keledi. Syrtqy ister ministrligi qazirdiń ózinde múddeli taraptar kelissóziniń birneshe raýndyn ótkizdi. Oǵan Qazaqstan tarapynan ekonomika men qarjy salasyna jumyldyrylǵan memlekettik organdar, «Atameken» UKP ókilderi, AQSh tarapynan Elshilik, Memlekettik departamenti, ózge de vedmostvolarynyń ókilderi qatysty. Atalǵan konsýltatsiialar barysynda bizdiń tarapymyzǵa osy sanktsiialar kezinde ne isteýmizge qatysty egjei-tegjeili jaýap berildi. Shyndyǵynda amerikalyq tarap naryqtarymyzdyń, ekonomikamyzdyń ózara tyǵyz bailanysty ekenin túsinip otyr jáne olar sanktsiialardyń qazaqstandyq ekonomikaǵa áserin barynsha jeńildetýge, tómendetýge tyrysýda. Bul baǵytta jumys odan ary da jalǵasa beredi», - dedi Aqan Rahmetýllin.
