AQSh qarjy ministrligi birqatar reseilik azamattarǵa qarsy sanktsiialar engizdi. Ministrlik saitynda jariialanǵan aqparatta burynǵy SSSR elderindegi qylmys álemine qatysy bar kei adamdardyń aty-jóni atalǵan, dep jazady Azattyq.
"Qara tizimge" engizilgender arasynda reseilik keibir BAQ qylmys áleminiń iri ókilderi ("vor v zakone") dep sipattaityn Alimjan Tohtahýnov (laqap esimi - "Taivanchik"), Zaharii Kalashov ("Shakro Molodoi"), Rýben Tatýlian ("Robson"), Vladimir Tiýrin ("Tiýria"), qyrǵyzstandyq Qamshybek Kólbaev ("Kolia-qyrǵyz"), Ózbekstan azamaty Gafýr Rahimov ("aqbas Gafýr") jáne ózgeler bar. Olarǵa amerikalyq azamattarmen biznes júrgizýge jáne AQSh aýmaǵyna kelýine tyiym salynady.
Tizimdegilerdiń ishinen Vladimir Tiýrindi buǵan deiin Ýkraina bas prokýratýrasy biyl naýryzda Kievte qastandyqpen óltirilgen Resei memlekettik dýmasynyń burynǵy depýtaty Denis Voronenkovtyń qazasyn uiymdastyrýshy retinde ataǵan. Tiýrin ol aiyptaýdy joqqa shyǵarǵan.
Sonymen birge Rýben Tatýliannyń ieligindegi eki reseilik kompaniiaǵa qarsy sanktsiia engizilgen.
AQSh biligi bul sanktsiialardy burynǵy SSSR elderinen shyqqan "kánigi baýkespelerge" ("vory v zakone") qarsy kúres aiasynda qabyldaǵan. Atalǵan qylmystyq top Resei, AQSh, Grekiia, Ispaniia jáne Ýkraina aýmaǵynda áreket etedi.
Budan bir kún buryn AQSh qarjy ministrligi "Magnitskii zańy" aiasynda 13 adam jáne 39 uiymǵa qarsy sanktsiialar jariialaǵan. "Qara tizimge" alynǵandar arasynda Resei bas prokýrory Iýrii Chaikanyń uly Artem, Ózbekstannyń burynǵy prezidentiniń úlken qyzy Gúlnára Karimova, Kievtegi "Berkýt" arnaiy jasaq polkiniń burynǵy basshysy Sergei Kýsiýk te bar.
