Reseide qamaýda otyrǵan oppozitsiialyq saiasatker Aleksei Navalnyi dereý bosatylýy tiis. Bul týraly AQSh prezidenti Djo Baiden memlekettik departament qyzmetkerlerimen kezdesý kezinde aitty.
Prezident Baiden jaqynda Resei basshysy Vladimir Pýtinmen telefonmen áńgimeleskenin eske saldy. Baidenniń sózine qaraǵanda, áńgime barysynda ol Reseidiń qyzý qimyldaryna kóz juma qarap otyratyn dáýir aiaqtaldy dep aitqan. Ol Reseidiń prezident sailaýyna aralasýy jáne kibershabýyl uiymdastyrýyn mysal retinde ataǵan.
Baiden jinalǵandarǵa Máskeý Amerika demokratiiasyna áli de nuqsan keltirýge bar degen. "Eger odaqtastarymyzben birlese qimyldasaq, Reseige tiimdirek tótep bere alamyz" dedi prezident.
Ol sonymen birge Vashington halyqaralyq qaýymdastyqpen tyǵyz qarym-qatynasty jandandyrǵysy keledi dep atap ótken.
- 4 aqpanda AQSh memlekettik hatshysy Entoni Blinken men Resei syrtqy ister ministri Sergei Lavrov telefonmen áńgimelesip, Navalnyimen bailanysty oqiǵalardy da talqylaǵan. Lavrov AQSh memlekettik hatshysyn Resei zańdaryn qurmetteýge shaqyrǵan. Buǵan qosa, SIM Máskeýdiń Vashingtonmen qatynasty qalypqa keltirýge ázir ekenin jetkizgen.
- Buǵan deiin bir top demokrat jáne respýblikashyl senator AQSh kongresine "Reseidi qastyq áreketi úshin jaýapqa tartý týraly" zań jobasyn usynǵan. Onda Navalnyidy ýlaýǵa jáne "Novichok" ýyn jasaǵandarǵa qatysy bar resmi tulǵalarǵa sanktsiia salý jaǵy qarastyrylǵan.
- Resei biligi Navalnyidyń ýlanýyna qatysy joǵyn aitady.
