AQSh prezidentiniń ákimshiligi Soltústik Koreianyń qurlyqaralyq ballistikalyq zymyran ushyrǵany týraly málimdemesin rastady. Soltústik Koreia prezidenti Kim Chen Yn synaqty "Tramp ákimshiligine AQSh-tyń táýelsizdik kúnine jasalǵan syilyq" dep ataǵan. Aq úi barlyq kúsh-jigerdi ulǵaiyp kele jatqan qaýip-qaterge qarsy is-qimyldarǵa jumsaitynyn málimdedi.
Soltústik Koreia zymyran ushyrǵan soń sársenbide AQSh pen Ońtústik Koreia Korei túbeginiń shyǵys jaǵalaýynda birikken áskeri jattyǵý ótkizip, ballistikalyq zymyrandar atty.
Pheniannyń málimdeýinshe, "Hvanson 14" tipti zymyran "aýyr iadrolyq oqtumsyqty" AQSh-tyń qurlyqtaǵy territoriiasyna jetkize alady. Seisenbidegi ushyrylymda zymyrannyń alǵashqy eki basqyshy synalǵan. Sonymen qatar zymyrannyń basqy bóliginiń atmosferanyń tyǵyz qabatyna ekinshi qaita engende joǵary temperatýraǵa jáne terbelýge tózimdi ekeni anyqtalǵan.
BUU Qaýipsizdik keńesi sársenbide AQSh-tyń suraýy boiynsha Soltústik Koreianyń zymyran synaýyna bailanysty Korei túbeginde qalyptasqan jaǵdaidy talqylaý úshin shuǵyl jiyn ótkizbek. BUU bas hatshysy Antonio Gýterrish Pheniannyń BUU Qaýipsizdik keńesiniń qararlaryn buzyp, zymyran jáne iadrolyq qarý jasaý áreketterin qatań aiyptady. Gýterrish sonymen qatar Soltústik Koreia basshylyǵyn arandatpaýǵa jáne halyqaralyq mindettemelerin tolyq oryndaýǵa shaqyrdy.
