AQSh Resei basshysy prezident Vladimir Pýtinniń ainalasyndaǵy oligarhtar men ózge de yqpaldy tulǵalarǵa jańa sanktsiia saldy. Sanktsiiaǵa ilingender arasynda Kreml baspasóz hatshysy Dmitrii Peskov te bar.
Resei Ýkrainaǵa basqynshylyq jasap, myńdaǵan adamnyń jaraqattanyp, qaza bolǵany týraly habar taraǵan shaqta osyndai aqparat shyǵyp otyr. BUU málimetinshe, shamamen bir million adam Ýkrainadan bosyp ketken.
Aq úi habarlamasynda "Pýtinniń bas nasihatshysy" dep atalǵan Peskovtan bólek, oligarh Álisher Osmanovqa da sanktsiia salǵany jazylǵan. Habarlamada ol Reseidegi eń aýqatty adam, Pýtinge jaqyn adamdardyń biri dep sipattalǵan.
Sonymen birge AQSh memlekettik departamenti 19 reseilik oligarh pen olardyń otbasy múshelerine, kómekshilerine vizalyq tyiym salǵanyn habarlady. Aq úi habarlamasyna sáikes, bul tulǵalar "Resei halqynyń esebinen baiyǵan". Tizimge engen tulǵalardyń aktivteri buǵattalyp, AQSh-qa barýyna tyiym salynady.
Ulybritaniia úkimeti de Osmanov pen premer-ministrdiń burynǵy orynbasary Igor Shývalovqa shekteý qoidy. Ulybritaniia syrtqy ister ministrligi bul ekeýin "Ulybritaniiada múddesi bar, Kremlge jaqyn" adamdar retinde sipattaidy.
Buǵan deiin Batys Reseidiń Ýkrainadaǵy basqynshylyǵyna qarsy Resei biligine sanktsiia salǵan. Sanktsiia salynǵandar arasynda prezident Vladimir Pýtin, onyń baspasóz hatshysy Dmitrii Peskov, syrtqy ister ministri Sergei Lavrov bar.
