اقش رەسەي باسشىسى پرەزيدەنت ۆلاديمير پۋتيننٸڭ اينالاسىنداعى وليگارحتار مەن ٶزگە دە ىقپالدى تۇلعالارعا جاڭا سانكتسييا سالدى. سانكتسيياعا ٸلٸنگەندەر اراسىندا كرەمل باسپاسٶز حاتشىسى دميتريي پەسكوۆ تە بار.
رەسەي ۋكرايناعا باسقىنشىلىق جاساپ, مىڭداعان ادامنىڭ جاراقاتتانىپ, قازا بولعانى تۋرالى حابار تاراعان شاقتا وسىنداي اقپارات شىعىپ وتىر. بۇۇ مەلٸمەتٸنشە, شامامەن بٸر ميلليون ادام ۋكراينادان بوسىپ كەتكەن.
اق ٷي حابارلاماسىندا "پۋتيننٸڭ باس ناسيحاتشىسى" دەپ اتالعان پەسكوۆتان بٶلەك, وليگارح ەلٸشەر وسمانوۆقا دا سانكتسييا سالعانى جازىلعان. حابارلامادا ول رەسەيدەگٸ ەڭ اۋقاتتى ادام, پۋتينگە جاقىن ادامداردىڭ بٸرٸ دەپ سيپاتتالعان.
سونىمەن بٸرگە اقش مەملەكەتتٸك دەپارتامەنتٸ 19 رەسەيلٸك وليگارح پەن ولاردىڭ وتباسى مٷشەلەرٸنە, كٶمەكشٸلەرٸنە ۆيزالىق تىيىم سالعانىن حابارلادى. اق ٷي حابارلاماسىنا سەيكەس, بۇل تۇلعالار "رەسەي حالقىنىڭ ەسەبٸنەن بايىعان". تٸزٸمگە ەنگەن تۇلعالاردىڭ اكتيۆتەرٸ بۇعاتتالىپ, اقش-قا بارۋىنا تىيىم سالىنادى.
ۇلىبريتانييا ٷكٸمەتٸ دە وسمانوۆ پەن پرەمەر-مينيستردٸڭ بۇرىنعى ورىنباسارى يگور شۋۆالوۆقا شەكتەۋ قويدى. ۇلىبريتانييا سىرتقى ٸستەر مينيسترلٸگٸ بۇل ەكەۋٸن "ۇلىبريتانييادا مٷددەسٸ بار, كرەملگە جاقىن" ادامدار رەتٸندە سيپاتتايدى.
بۇعان دەيٸن باتىس رەسەيدٸڭ ۋكرايناداعى باسقىنشىلىعىنا قارسى رەسەي بيلٸگٸنە سانكتسييا سالعان. سانكتسييا سالىنعاندار اراسىندا پرەزيدەنت ۆلاديمير پۋتين, ونىڭ باسپاسٶز حاتشىسى دميتريي پەسكوۆ, سىرتقى ٸستەر مينيسترٸ سەرگەي لاۆروۆ بار.
